Zaburi 6 - KITABU KITAKATIFU

Ku Munene Wetsinyimbu; Lisaala inyinga ye kivi kuteva tsimavasi. Zaburiya Daudi

¹ O Yahova u ta ng'ondokera mbutima bubwo, Kandi u ta ngerihidza mu budunyi bululu bubwo.

² U mbere tsimbabasi, O Yahova; kigira mbeye mudedekere: O Yahova, u mbonnye; kigira vigumba vyange vi dambidzangwa.

³ Kandi mwoyo gwange gu dambidzangwa ligali: Na ive, Yahova, u la duka inyinga ki?

⁴ Wirane, O Yahova, u boholole mwoyo gwange: U mbonnye kigira ubuyanzi bubwo.

⁵ Kigira mu likudza si ha li nekyokukwidzulitsira: Mu Kihadisi ibwaha u li ku santidza?

⁶ Likenya lyange li nduhidzanga; Ubudiku bwosi ntsiriridza ubugono bwange; Kandi nkindidza kitali kyange na maliga gange.

⁷ Imoni yange i niaye kigira buvereri bwange; I gwiye inkungu kigira avasigu vange vosi.

⁸ Twuli ku inze, mwinye vosi ava kola ubudamano; Kigira Yahova u huliye mwoyo gwelilira lyange.

⁹ Yahova u huliye lisaala lyange; Yahova a la bugirira lisaala lyange.

¹⁰ Avasigu vange vosi va la nyola tsisoni, na va la dambidzwa ligali: Va liranywa inyima, na va la nyola tsisoni bwangu.