Zaburi 105 - KITABU KITAKATIFU

¹ Mu santidze Yahova, mwanire lieta lilye; Mu vuulire avetsihiri vikolwa vivye.

² Mu mwimbire, mwimbe tsyokumwidzominya; Mu vole miyinzi gyigye gyosi gyokugenya.

³ Mu kuminye ku lieta lilye litakatifu: Mwoyo gwa yava avenyanga Yahova, gu sangale.

⁴ Mwenye Yahova netsingulu tsitsye; Mwenye mmoni mwimwe kazozo.

⁵ Mwidzulitse miyinzi gyokugenya gya u koli, Vyokugenya vivye, na likalaga lyomunwa gwigwe,

⁶ O mwinye, visukululwi vya Abrahamu mutumekiri wewe, Na mwinye avana va Yakobo, vatovole veve.

⁷ A veye Yahova Nyasaye wetu: Likalaga lilye li veye mu lirova lyosi.

⁸ Yidzulitsi lilagana lilye mihiga nemihiga, Likuva lya ya laga ku visukululwi elfu

⁹ Lilagana lya ya lomba na Abrahamu, Na lyesuha lilye lya yisuhira Isaka,

¹⁰ Nalyo ya dinyeridzira Yakobo kuva lilaga Ku Israeli kuva lilagana lyemihiga nemihiga

¹¹ Kuvola, Nda ku ha kivala kya Kanani, Kya gerwa kuva miyandu gyenyu;

¹² Lwa va li avandu vakekeke mu livalidzwa, Yee, vakekeke ligali, na avageni mukyo.

¹³ Na ligenda lyavo lya li mu tsihiri na tsihiri, Kutwula ku bwami yibu kuduka ku avandu avandi.

¹⁴ Si ya leka mundu kali mulala ku vosi kuvadambidza; Yee, ya gondokera avami kigira yavo,

¹⁵ Kuvola, Mu ta dira avavake vange, Kandi mu ta kupidza avaprofeti vange kivi.

¹⁶ Naye ya langa inzala i gumire kivala; Yononnya vyokulia vyosi.

¹⁷ Ya tuma mundu imbiri wavo; Yosefa ya gulwa kuva mutumekiri:

¹⁸ Virenge vivye vya saliridzwa neviboheru: Mwene ya saliridzwa nevivya,

¹⁹ Kuduka inyinga likuva lilye lya dukidzwa Likuva lya Yahova lya mu geridza.

²⁰ Mwami ya tuma mundu na a mu boholola; Kali kumukola mwami ku avandu, na a mu boholola.

²¹ Ya mu kola munene wenyumba yeye Na mulindi wobutugi bwibwe bwosi;

²² Kuboha avanene veve kuli liyanza lilye, Nokwegidza avakulundu veve ubugeeri.

²³ Kandi Israeli va duka mu Egepeti; Na Yakobo ya menya mu kivala kya Ham.

²⁴ Ya meda avandu veve ligali, Na ya va ha tsingulu kuvita ava sigu vavo.

²⁵ Ya girunkannya mwoyo gwavo kudunyira avandu veve, Nokukolera avandu veve ubugadi.

²⁶ Ya tuma Musa mutumekiri wewe, Na Haruni wa ya tovola.

²⁷ Va kola hagati havo vilolekidzu vivye Na vyokugenya mu kivala kya Ham.

²⁸ Ya leta kisundi, na kya gwa kisundi; Navo si vambakana makuva gege.

²⁹ Ya girunkannya amadzi gavo kuva masahi, Na yiita tsisudzi tsyavo.

³⁰ Kivala kyavo kyezula makere Kuduka mu tsinyumba tsya avami vavo.

³¹ Ya vola na maduuma getsingi ga duka, Na tsindaa tsya landa tsimbega tsyavo tsyosi.

³² Ya va ha imbula yamagina mbu gono bwembula, Na ulumemo lwomuliru mu kivala kyavo.

³³ Yononnya mizabibu gyavo na mikuyu gyavo, Na ya vunannya misala gyetsinzako tsyavo.

³⁴ Ya vola, na tsisigi tsyadza, Na ubutsiriri, kandi bu ta nyala kuvalidzwa,

³⁵ Na tsya lia bunyasi bwosi bwekivala kyavo, Na tsya lia lyama lya marova gavo.

³⁶ Kandi ya kuya ava tanga kwivulwa vosi mu kivala kyavo, Litanga lyetsingulu tsyavo tsyosi.

³⁷ Ya va leta kyova, na va li nefetha na ithahabu Na si ha li nomudedekere kali mulala mu tsihiri tsitsye.

³⁸ Egepeti ya sangala kigira litwula lyavo; Kigira va li nobutii kuvo.

³⁹ Ya leta lilesi kuvakunika, Na muliru kuvaha ubulavu mbudiku.

⁴⁰ Va teva, na a va letera tsisi ndu, Na a vigutidza ubukima bu twula migulu.

⁴¹ Ya kunula lwanda, na amadzi ga senuka; Ga genda kuli mugera mu kivala kyumu.

⁴² Kigira yidzulitsa likuva lilye litakatifu Na Abrahamu mutumekiri wewe.

⁴³ Naye ya twulidza avandu veve nelisangala Avatovole veve netsinyimbu.

⁴⁴ Ya va ha vivala vyetsihiri; Navo va vugula miyinzi gyetsihiri kuva miyandu:

⁴⁵ Va duke kugumira amalago gege, Nokulonda lilagana lilye. Mwidzominye Yahova.