Vikolwa 8 - KITABU KITAKATIFU

¹ Tsindolo. Kandi Saulo ya bugirira likudza lilye. Ku lidiku yilyo lidambidzwa linene lya duka ku livugana lya li mu Yerusalemi; navo va salanywa vosi mu kivala kye Buyuda nekya Samaria, bugira avatumwa.

² Avandu avatia Nyasaye va ta Stefano, ni va mu lirira neliverera linene.

³ Navutswa Saulo yononnya livugana ligali, ni yingira mu tsinyumba tsyosi, na a hila avasatsa navakali netsingulu na a va vika mu inyumba yavahambe.

⁴ Kigira yaga yava ava salana va vodonkana ni vilwadza likuva yili.

⁵ Kandi Filipu ya sulunguta mu lidala lya langwa Samaria, na a vilwadzira amakuva ga Kristo.

⁶ Viduma vya huliridza nomwoyo mulala amakuva ga Filipu ya vola, lwa va hulira ni va lola vilolekidzu vya ya kola.

⁷ Kigira roho midamano gya twula mu vanyingi, ni gyi hanzuka ni gyi lira: navanyingi va fwogoya, na va leema, va honnywa.

⁸ Ma bwa li ubuyanzi ubunene mu lidala yilyo.

⁹ Navutswa ya li yo mundu mulala wa langwa Simoni, lwambiri ya kola ubusegetiri mu lidala, na a gennya ihiri ya Samaria, na a vola mwene a veye munene.

¹⁰ Vosi va mu hulira, kutwula ku vakekeke nokuduka ku vanene, ni va vola, Mundu, uyu a veye tsingulu tsya Nyasaye u langwa Munene.

¹¹ Kandi va mu londa, kigira ya va gennya nobusegetiri bwibwe inyinga inene.

¹² Navutswa lwa va suuvira lilwadza lya Filipu lyamakuva malahi gobwami bwa Nyasaye, na gelieta lya Yesu Kristo, va batidzwa avasatsa navakali.

¹³ Kandi Simoni mwene ya suuvira: na a batidzwa na a menya na Filipu; kandi ya genya lwa ya lola vilolekidzu nevyokugenya vinene vi kolangwa.

¹⁴ Kunangwa, avatumwa va li mu Yerusalemi lwa va hulira Samaria va bugirira likuva lya Nyasaye, va va hilira Petro na Yohana.

¹⁵ Yava lwa va mala kusulunguta wavo, va va saalira va hebwe Roho Mutaka tifu:

¹⁶ kigira a kikiri kwika kuvo kali mulala: navutswa va mala kubatidzwa ku lieta lyo Mwami Yesu.

¹⁷ Kunangwa va vika makono gavo kuvo, navo va hebwa Roho Mutakatifu.

¹⁸ Ku, Simoni lwa ya lola Roho Mutakatifu a letwa nokuvikwa mu makono gavatumwa, ya va ha ifetha,

¹⁹ na a vola, Mpe inze kandi tsingulu yitsi, ku vosi wa mbika kuye makono gange a duka kuvugula Roho Mutakatifu.

²⁰ Navutswa Petro ya mu volera, Ifetha yoyo i gote halala nive kigira u ganagana kunyola kihaanwa kya Nyasaye nefetha.

²¹ Ive si u veye nelisanga kinga ikura ku likuva yili, kigira mwoyo gugwo si gu veye mulahi imbiri wa Nyasaye.

²² Kigira yaga weganire ubudamano bubwo yibu, u saale Mwami, ni mbula u samefwe tsiganagani tsyomwoyo gugwo.

²³ Kigira nku lola u veye mu bululu kuli indulwi, kandi u veye mu libofwa lyobudamano

²⁴ Simoni ya tivula na a vola, Mu nsaalire mwinye ku Mwami, vindu yi vi vya mu vola vi ta duka ku inze.

²⁵ Kunangwa lwa va mala kulolekidza nokuvola likuva lyo Mwami, virana Yerusalemi, ni vilwadza ivangeli mu tudala tunyingi twa Vasamaria.

²⁶ Navutswa ingelosi wo Mwami ya volera Filipu, na a vola, Twula, u tsie ha luvega lwakusini kuduka ku inzira yeyo i sulunguta kutwula Yerusalemi kuduka Gaza: i veye mu kyangalangwi.

²⁷ Kandi ya twula na a tsia: kandi henza, ya lola mundu wa Ethiopia, kitsiri mwene tsingulu, mukekeke ku Kandaki, mwami wekikali wa Vaethiopia, wa li na a veye ku butugi bwibwe bwosi, naye yadza Yerusalemi kusigamira;

²⁸ kandi yirana, ni yikala ku ligari, na a soma muprofeti Isaya.

²⁹ Kandi Roho ya volera Filipu, Wisunde himbi u hambane neligari yili.

³⁰ Filipu ya nyagula na a duka kuye, na a mu hulira a soma Isaya muprofeti, na a mu teva, U hulira yaga aga u soma?

³¹ Ya mu tivulira, Mbulira ndi, ni nta nyola mundu kunzimirira? Kandi ya saala Filipu a nine yikale naye.

³² Amakuva gamang'oda ga ya soma ga li yaga: Yimirirwa kuli ligondi kutsia ha giitirangwa Kandi kuli mwana weligondi a kiring'ana imbiri wa uyu u kalaga ubwoya, Naye a veye ndi, si a kunula munwa gwigwe:

³³ Mu lyegehidzwa lilye ya sulirwa mu kyina: Ibwaha u li vuulira likula lilye? Kigira livamwoyo lilye li twulldzeywi mu lirova.

³⁴ Kandi kitsiri ya tivulira Filipu na a vola, Nku saala, muprofeti a vola makuva yaga ku bwaha? Ku m wene naho ku wundi?

³⁵ Ma Filipu ya kunula munwa gwigwe na a mwilwadzira amakuva malahi ga Yesu, ya tanga ku mang'oda yaga.

³⁶ Navo lwa va li va genda ku inzira va duka ha madzi malala: kitsiri ya vola, Henza amadzi; amakuva ki ga ngayidza nta batidzwa?

³⁷ Filipu ya vola, Nu u suuvira nomwoyo gugwo gwosi, u nyala. Ya tivula, na a vola, Nsuuviye Yesu Kristo niye Mwana wa Nyasaye.

³⁸ Ya haana munwa ligari li singire: navo vombi vika mu madzi, vombi Filipu na kitsiri; na a mu batidza.

³⁹ Kandi lwa va mala kusenuka kutwula mu madzi, Roho wo Mwami ya hulula Filipu: na kitsiri si ya mu lola kandi, na ya londa inzira yeye nobuyanzi.

⁴⁰ Navutswa Filipu ya loleka mu Azotu: kandi ya vita ni yilwadza ivangeli mu madala gosi kuduka Kaisaria.