Vikolwa 19 - KITABU KITAKATIFU

¹ Inyinga Apolo ya li mu Korintho, Paulo ya mala kuvita mu kivala iluhya na a duka Efeso, na a nyola yo avegidzwi valala.

² Kandi ya va teva, Mwa vugula Roho Mutakatifu lwa mwa suuvira? Navo va mu volera, Auwa, si kwa hulira makuva ga Roho Mutakatifu mba.

³ Kandi ya vola, Mwa batidzwa mu li ki? Ni va vola, Mu libatidza lya Yohana.

⁴ Kandi Paulo ya vola, Yohana ya batidza nelibatidza lyokweganira, na a volera avandu va suuvire uyu u li mu londa, naye niye Yesu.

⁵ Kandi lwa va hulira yaga v a batidzwa mu lieta lyo Mwami Yesu.

⁶ Kandi Paulo lwa ya mala kuvika kuvo makono gege, Rnho Mutakatifu yadza kuvo; ni va vola netsinimi, ni va profeta.

⁷ Yava vosi va duka mbula avasatsa likumi na vaviri.

⁸ Kandi yingira mu lisomero na a vola nobuluviriri imyeli gyivaka, na a vola na a goonya ku vindu vyobwami bwa Nyasaye.

⁹ Navutswa avalala lwa va duka kwidinyiridza ni va sula kusuuvira, ni va vola ubudamano ku Inzira yiyi imbiri wekiduma, ya twula na a va leka, ni yahula avegidzwi, na a vola amakuva kazozo mu lisomero lya Turano.

¹⁰ Kandi yaga ga li ndiyo mihiga gyiviri; kuduka vosi ava menya Asia va hulire likuva lyo Mwami, Avayuda kandi Avagreki.

¹¹ Nyasaye ya kola vilolekidzu na makono ga Paulo vi ta li kuli vindi:

¹² kuduka avalwaye va leterwa vitambaya netsingubo tsi twula ku mubiri gwigwe, kandi ubulwaye bwa va leka nemyoyo midamano gya twula.

¹³ Navutswa avalala ku Vayuda va vodonkana, avambuli, va geridza kutala lieta lyo Mwami Yesu kuvo ava syukirwa nemyoyo midamano, va vola, Mmu suhira ku Yesu wa Paulo yilwadza.

¹⁴ Va li ho avandu vatanu na vaviri avana va Sikeva, Muyuda, musalisi munene, ava kola ndiyo.

¹⁵ Mwoyo mudamano gwa tivula ni gu va volera, Yesu mmanya, kandi Paulo mmanya, navutswa mwinye mu veye avandu ki?

¹⁶ Kandi mundu uyu wa syukirwa nomwoyo mudamano ya tuuma kuvo na a va vita tsingulu, na a va guuta vosi, va duke kwiruka kutwula mu inyumba chahonyo kandi va li netsing'oma.

¹⁷ Yaga ga manyekana ku vosi Vayuda na Vagreki, ava menya Efeso; kandi vosi va gumirwa nobutii, nelieta lyo Mwami Yesu lidzominywa.

¹⁸ Kandi avanyingi kuvo va suuvira vadza ni veyama, ni va vuula miyinzi gyavo.

¹⁹ Kandi ava ta li vakekeke ku ava kola ubusegetiri va leta halala vitabu vyavo ni va vi sambira imbiri wa vosi; kandi va validza hesabu yemiyandu ni va nyola gyi duka if etha tsielfu amakumi gatanu.

²⁰ Ni ndiyo likuva lyo Mwami lya landa ni li guuta.

²¹ Inyima yamakuva yaga Paulo ya saavira mu mwoyo lwa ya mala kuvita Makedonia na Akaiya, kutsia Yerusalemi, na a vola, Ni mmali kutsia yo, nu bulahi kandi ndole Romi.

²² Ya tuma avandu vaviri kuvo ava mu tumekira kutsia Makedonia, yava ni Timoteo na Erasto navutswa mwene ya menya Asia inyinga i duki.

²³ Kandi mu madiku yago kya li ho kivihiri kinyingi, ku makuta ge Inzira yiyi.

²⁴ Kigira mundu mulala wa langwa Demeterio mutuli wefetha, wa lomba tutempeli twefetha twa Diana, ya leta avasidza ubutugi bunyingi;

²⁵ ava ya vugannya, halala navayinziri ava veye nemiyinzi gyolugano yilu, na a vola Vasatsa, mwinye mu manya ku nyola ubutugi bwetu ku miyinzi yigyi.

²⁶ Mu lola kandi mu hulira si ha li hano mu Efeso mweng'ine navutswa kuduka mu Asia mwosi, Paulo uyu ya goonya na a girunka nnya avandu vanyingi, a vola ava lombwa namakono si va li avanya saye mba.

²⁷ Si gyi li miyinzi gyetu gyeng'ine gyenya kulegwa; navutswa kandi litempeli lya nyasaye munene wekikali, Diana, li volwa si ki li kindu, kandi mwene a twulidzwe mu bunene bwibwe, wa ava Asia vosi navomuvivala vyosi va sigamira.

²⁸ Kandi lwa va hulira yaga vizula ubutima, ni va ha nzuka, ni va vola, Munene ni Diana wa Vaefeso.

²⁹ Kandi lidala lyosi lizula kivihiri: kandi va nyagula nomwoyo mulala ni vingira mu inyumba yobukino, va mali kugumira Gayo na Aristarko, avandu va Makedonia, ava genda halala na Paulo.

³⁰ Kandi Paulo lwa yenya kwingira hagati ha avandu, avegidzwi va mwigalira.

³¹ Kandi ava lala ku vanene va Asia ava li avalina veve, va mu hilira amakuva ni va mu goonya a ta hagiridza a tsie mu inyumba yobukino.

³² Kunangwa avalala va vola lugano, navandi lugano; kigira kyina kya li nekivihiri; kandi avanyingi kuvo si va manya kya va vuganira.

³³ Ni va twulidza Alekisandero mu kiduma, Avayuda va mu vika hambiri. Kandi Alekisandero ya va sima nomukono, yenya kutivulira avandu.

³⁴ Navutswa lwa va lola a veye Muvuda, vosi nomwoyo mulala va hanzuka inyinga yenya kuduka tsisaa tsiviri, ni va vola, Diana wa Vaefeso a veye munene.

³⁵ Kandi karani welidala lwa ya mala kukiring'annya kiduma, ya vola, Mwinye avasatsa va Efeso, ha li nomundu ki u ta manya lidala lya Vaefeso nilyo li linda litempeli lya Diana munene, nekif u ananyi kya gwa kutwula wa Zeu?

³⁶ Kunangwa kigira vindu yivi si vi nyala kwambakanywa, nu bulahi mwinye mu kiring'ane, mu ta kola kindu bwangubwangu.

³⁷ Kigira mu mali kuleta hano avandu yava, ava ta li avivi vevindu vyelitempeli, kandi si va li avanyegi vomunyasaye wetu wekikali.

³⁸ Kunangwa Demeterio navasidza ava veye halala naye, ni va va ni va veye nelikuva ku mundu, vyina vi veye ho, navanyampara va veye ho: va tsie kuyalana.

³⁹ Navutswa ni mwenya kindu ku makuva gandi, ga li volwa mu kyina kyomwima.

⁴⁰ Kigira kwinye ku lenya kuyalwa ku kivihiri kya lero, kigira si ki veye nekindu: kandi si ku nyala kuvola kivune ku kyina yiki.

⁴¹ Kandi lwa ya mala kuvola ndi ya sendu kidza avekyina.