Varumi 2 - KITABU KITAKATIFU

¹ Kigira yaga, ive mundu, ku vosi u kalaganga, si u veye nekyokutivula: kigira mu yaga aga u kalagira wundi wekalagiranga mwene; kigira ive u kalaganga, u londanga vindu zana.

² Kwinye ku manya ligali likalaga lya Nyasaye li veye mu ageligali ku vosi ava londanga vindu yivi.

³ Kandi ive mundu, u ganagana ndi, u kalagira yavo ava londa vindu yivi na ive mwene u londa vya zana, u la hona mu likalaga lya Nyasaye?

⁴ Naho u leganga ubutugi bwobugasu bwibwe nobwikudzihidzi bwibwe nobwikudziri bwibwe, si u manya ubulahi bwa Nyasaye bu ku letera lyeganira?

⁵ Navutswa ku budinyu bubwo nomwoyo gugwo gu ta li nelyeganira, wevikiranga akiba yobutima mu lidiku lyobutima nelyelilang'aminywa lyelikalaga lilu ngi lya Nyasaye.

⁶ Kigira a li ha avandu vosi kuli miyinzi gyavo:

⁷ yavo avikudziranga mu miyinzi milahi venya ubukumi, nelidzominywa, nevya vula ubwoneku, va la hebwa livamwoyo lyemihiga nemihiga:

⁸ navutswa yavo avetsimbemba, ava ta hulira ageligali, navutswa va hulira aga ta li malungi, ubutima nobudunyi bu la va gwira,

⁹ kivi nobusaliri ku vandu vosi ava kolanga ubudamano, kutanga ku Vayuda, kandi ku Vagreki;

¹⁰ navutswa ubukumi nelidzominywa nemirembe ku vosi ava kolanga bulahi, kutanga ku Vayuda, kandi ku Vagreki:

¹¹ kigira Nyasaye si ya suvidza avandu.

¹² Kigira vosi ku yavo va hyola bugira lilaga va la diva bugira lilaga: na vosi ku yavo va hyola mu lilaga va la kalagirwa nelilaga:

¹³ kigira si va li ava huliranga lilaga ava veye nobulungi imbiri wa Nyasaye, navutswa yavo ava kolanga lilaga nivo ava li volwa va veye nobulungi;

¹⁴ (kigira Tsihiri tsi ta li nelilaga lwa va kola avene vindu vyomu lilaga, yavo ava ta li nelilaga va mali kuva nelilaga avene.

¹⁵ Ku makuva yaga va vuulanga miyinzi gyelilaga lya ng'odwa mu myoyo gyavo, netsiganagani tsyavo luganolugano tsi va kalagira kinga tsi ra vera):

¹⁶ ku lidiku lya Nyasaye a li kalagira livisa lyavandu kuli ivangeli yange, mu Yesu Kristo.

¹⁷ Navutswa, ive nu u langwa lieta lyo Muyuda, nokuyeka ku lilaga, nokwiidzominya mu Nyasaye,

¹⁸ nokumanya ubulaliri bwibwe, nokuyanza miima gyi veye milahi, nive u duke kwegidzwa mu lilaga,

¹⁹ nokumanya ligali ive mwene u veye mwimiriri wavaboku, nobulavu bwa va veye mu kisundi,

²⁰ nomugerihidzi wavasiru, nomwegidzi wavana, u veye nelimanya nageligali mu lilaga;

²¹ kunangwa ive wegidzanga wundi, si weyegidza ive mwene? Ive wilwadza, mundu a tiba, ive mwene wibanga?

²² Kandi, ive u volanga mundu a ta heya, ive mwene u heyanga? Ive u dunyiranga misambwa, wibanga mu matempeli?

²³ Kandi ive wiidzominya mu lilaga, wononnyira ubukumi bwa Nyasaye ku lyononnya lilaga?

²⁴ Kigira lieta lya Nyasaye li nyegangwa mu Tsihiri kigira mwinye, kuli aga ng'odwa.

²⁵ Kigira likevwa li konya ligali, ive nu u londa lilaga: navutswa nu wononnya lilaga likevwa lilyo li gwiye li vula kukevwa.

²⁶ Kunangwa uyu u vula kukevwa na a londa miima gyelilaga, livula kukevwa lilye si li la volwa kuva likevwa?

²⁷ Kandi livula kukevwa lyene ni li kola lilaga si li la ku kalagira, ive kuva mwoni, ive u veye namang'oda nelikevwa navutswa wo nonya lilaga?

²⁸ Kigira uyu si a veye Muyuda u veye Muyuda ku mubiri vutswa; kandi likevwa si li veye yili li veye ku mubiri vutswa:

²⁹ navutswa uyu a veye Muyuda u veye Muvuda mugati; nelikevwa ni yili lyomwoyo, mu roho si li veye mu induguta; lidzominywa lilye si li veye lyavandu, navutswa lya Nyasaye.