Vakalagi 8 - KITABU KITAKATIFU

¹ Ma avandu va Efiraim va mu volera, Kigira ki ive u ku koleranga kuli yaga, ive wa vula kukulanga, lwa wa tsia kulwana na Midiani? Na va lembana naye ligali.

² Naye ya va volera, Inze nkoli ki kalunu kuli kya mwinye mwa kola? Lidola lya mazabibu gang'alika aga Efiraim si li veye lilahi kuvita ligesa lya Abiezeru?

³ Nyasaye ya vika mmakono genyu avanene va Midiani, Orebu na Zeebu: na inze nda kola ki kuli mwinye mwa kola? Hene yaho ubutima bwavo bwa vomboloka kuye, lwa ya vola yaga.

⁴ Na Gideoni ya duka Yordani, na yambuka, uyu navandu tsimia tsivaka ava li halala naye, va li va veye nehuyuki, navutswa va londerera ndiyo.

⁵ Naye ya volera avandu va Sukothu, Mwadza, mu va he ubukima avandu va londanga inze; kigira va veye nehuyuki, na inze nondereranga Zeba na Zalimuna, avami va Midiani

⁶ Navanene va Sukothu va vola, Makono ga Zeba na Zalimuna ga veye mmukono gugwo kalunu, kwinye kuduka kuha lihe lilyo ubukima?

⁷ Na Gideoni ya vola, Kigira yaga lwa Yahova a vika Zeba na Zalimuna mmukono gwange, hene yaho nda halula mibiri gyenyu na amafwa gombulimu nolutavati.

⁸ Naye ya twula ho ni yanegira Penueli, na a volera vandu va ha zana makuva kuli yaga navandu va Penueli va mu tivulira kuli avandu va Sukothu va mu tivulira.

⁹ Naye ya volera avasatsa va Penueli, na a vola, Lwa ndirana nemirembe, ndononnya munara yigu.

¹⁰ Kalunu Zeba na Zalimuna va veye mu Karikori, namahe gavo ga veye halala navo, avasatsa ava duka kuli tsielfu likumi na tsitano, va veye vosi ava tigala ku lihe lyosi lyavana vevugwi; kigira va gwa avandu tsielfu mia na makumi gaviri ava tumekira kivavi.

¹¹ Na Gideoni yanegira ku inzira ya yavo ava menya mmahema ku luvega lwevugwi wa Noba na Jogibeha na ya kuya lihe yilyo; kigira lihe yilyo velola va la hona.

¹² Na Zeba na Zalimuna viruka; naye ya va londerera; na a gumira avami vaviri va Midiani, Zeba na Zalimuna, naye ya tihidza lihe yili lyosi.

¹³ Na Gideoni mwana wa Joashu ya gerera kutwula mu bulwani, kutwula ku kyanegiru kya Heresu.

¹⁴ Na ya gumira musoleli mulala mu va Sukothu, na ya mu teva: naye ya mu ng'odera ameta gavanene va Sukothu, na vakulundu velidala, avandu makumi gatano na gaviri na vatano na vaviri.

¹⁵ Na ya duka ku avandu va Sukothu, na a va volera, Henza Zeba na Zalimuna, ava mwa nembera ku, lwa mwa vola, Makono ga Zeba na Zalimuna ga veye kalunu mu mukono gugwo, kwinye ku duke kuha avandu vovo avaluhi ubukima?

¹⁶ Naye ya vugula avakulundu velidala, namafwa gombulimu nolutavati, ni yegidzira avandu va Sukothu navyo.

¹⁷ Na ya tsoma munara gwa Penueli nokwiita avasatsa velidala yilyo.

¹⁸ Hene yaho ya volera Zeba na Zalimuna, Avandu yava ava mwiita ha Taboru, va veye avandu volugano ki? Navo va mu tivulira, Va li kuli ive, sa mulala a loleka kuli mwana womwami.

¹⁹ Naye ya vola, Avandu yavo va li avamwavo vange, avana va mama wange: kuli Yahova a veye mwoyo, mu va mwa honnya avandu yavo, nkano nda vula kumwiita.

²⁰ Ma ya volera Jetheri mwana wewe wa tanga kwivulwa, Singira, wiite yava. Navutswa musoleli si ya somola kivavi kikye mba; kigira ya tia, kigira ya li musoleli vutswa.

²¹ Hene yaho Zeba na Zalimuna va vola, Ive singira, u gwe ku kwinye; kigira kuli umundu musatsa a veye, tsingulu tsitsye tsi veye ndiyo. Na Gideoni ya singira, ni yiita yavo Zeba na Zalimuna, na a vugula viyombe vya li mmagoti getsing'amia tsyavo.

²² Hene yaho avandu va Israeli va volera Gideoni, Wamehe ku kwinye, ive nomwana wowo, nomwisukulu wowo; kigira ive u mali kukuhonnya kutwula mmakono ga Midiani.

²³ Na Gideoni ya va volera, Inze si ndameha ku mwinye, kandi mwana wange si a lameha ku mwinye: Yahova a lameha ku mwinye.

²⁴ Na Gideoni ya va volera, Inze mbeye nelyenya lyange lya nyenyanga ku mwinye, li veye avandu sa mulala ya mbe tsimingiri tsyommatu tsyelilanya lilye. (Kigira va li netsimingiri tsyommatu tsyethahabu, kigira va li Vaishmaeli.)

²⁵ Navo va tivula, Ku la ku ha nemyoyo gyobulaliri. Navo vala ingubo hasi, nomundu sa mulala ya vika ku tsimingiri tsyommatu tsyelilanyalilye.

²⁶ Neligera lyetsiratili tsyetsimingiri tsyethahabu tsya ya teva tsya duka tsishekeli tsyethahabu elfu na tsimia tsitano ne tsiviri: tsi medwa ku viyombe, nevyo kwisyaha, netsingubo tsyekiforosadi tsyavami va Midiani vivika, nokumedwa ku minyororo gya li mmagoti getsing'amia tsyavo.

²⁷ Na Gideoni ya lomba kisibao, na ya ki vika mu lidala lilye, lidala lya Ofira: ma Israeli vosi va kola ubuheyi mulilonda lyakyo; nakyo kya duka kuva mutego ku Gideoni noku inyumba yeye.

²⁸ Na ndiyo Midiani va guutwa imbiri wavana va Israeli, na si va digulula kandi mitwe gyavo mba. Kivala kya li nemirembe mihiga makumi gane mmadiku ga Gideoni.

²⁹ Na Jerubaal mwana wa Joashu ya tsia kumenya mu inyumba yeye mwene.

³⁰ Na Gideoni ya li navana makumi gatano na gaviri avomubiri gwigwe gwivula; kigira ya li navakali vanyingi.

³¹ Nasuria wewe wa li ha Shekem, ya mwivulira mwana muyai, na ya mu gulika lieta lilye Abimeleku.

³² Na Gideoni mwana wa Joashu ya kudzira mbukulundu mulahi, na ya tebwa mu kilindwa kya Joashu dada wewe, mu Ofira lya Vaabieziri.

³³ Na ga duka, lwa Gideoni ya kudza, nonoho avana va Israeli va girunkana kandi, nokukola ubuheyi mu lilonda Baal, na va kola Baalberithu a ve nyasaye vavo.

³⁴ Avana va Israeli va vula kwidzulitsa Yahova Nyasaye wavo, wa va honnya ku makono gavasigu vavo vosi tsimbega tsyosi;

³⁵ kandi si va kolera inyumba ya Jerubaal bulahi, u a li Gideoni, kuli ubulahi bwosi bwa ya kolera Israeli.