Vakalagi 11 - KITABU KITAKATIFU

¹ Kunangwa Jefetha Mugileadi ya li umuluviriri ligali, na ya li mwana womukali wa malaya: na Gileadi yivula Jefetha.

² Nomukali wa Gileadi ya mwivulira avana vayai; na lwa avana vomukali wewe va viruka va kunga Jefetha, ni va mu volera Ive si u la nyola miyandu mu inyumba ya dada wetu; kigira ive u veye mwana womukali wundi.

³ Ma Jefetha yiruka avamwavo veve, na ya menya mkivala kya Tobu: navandu avoluyai va tsia kuhambana na Jefetha, ni va samula halala naye.

⁴ Kandi inyima, ga duka avana va Amon va lwana na Israeli.

⁵ Kunangwa, lwa avana va Amon va lwana na Israeli, avakulundu va Gileadi va tsia kuleta Jefetha kutwula kivala kya Tobu;

⁶ na va volera Jefetha, Hamba u ve mutwe gwetu, ku duke kulwana navana va Amon.

⁷ Na Jefetha ya volera avakulurldu va Gileadi, Mwinye si mwa dunyira inze, nokunkunga ntwule mu inyumba ya dada wange? Kigira ki mudzanga ku inze kalunu inyinga ya mu veye mu kivi?

⁸ Navakulundu va Gileadi va volera Jefetha, Kigira yaga ku girunkani nokuyeka ku ive kandi, u duke kutsia halala nekwinye, kulwana navana va Amon; na ive u la va umutwe gwetu ku avandu vosi ava Gileadi.

⁹ Na Jefetha ya volera avakulundu va Gileadi, Ni mu va ni mu nzirannya wetu kulwana navana va Amon, na Yahova na a va na a va guuta imbiri wange, inze nda va mutwe gwenyu?

¹⁰ Navakulundu va Gileadi va volera Jefetha, Yahova a la va mulolekidzi hagati hetu; n ligali kwinye ku la kola kuli likuva lilyo.

¹¹ Kunangwa Jefetha ya tsia halala navakulundu va Gileadi, navandu yavo va mu kola a ve mutwe numunene kuvo: na Jefetha ya volera makuva gege gosi imbiri wa Yahova ha Mizipa.

¹² Na Jefetha ya tuma avatumwa ku mwami wavana va Amon, na a vola, U veye nekindu ki ku inze, u luhe u duke ku inze kulwana nekivala kyange?

¹³ Nomwami wavana va Amon ya tivulira vatumwa va Jefetha, Kigira Israeli va vugula kivala kyange, lwa vanegira kutwula mkivala kya Egepeti, kutwula Arnon kuduka Jaboku, kuduka Yordani: kunangwa kalunu yirannya vivala yivi kandi nemirembe.

¹⁴ Na Jefetha ya tuma avatumwa hali kaviri ku mwami wavana va Amon;

¹⁵ na va mu volera, Jefetha a volanga ndi: Israeli si va vugula kivala kya Moabu, kinga kivala kyavana va Amon,

¹⁶ navutswa lwa va twula Egepeti, na Israeli va vitira hagati mu kyangalangwi, kuduka ku Inyanza Inzakanyu, nokuduka Kedesh;

¹⁷ hene yaho Israeli va tuma avatumwa ku mwami wa Edom, ni va vola, Nku goonya u mbe munwa, mbite mu kivala kikyo; navutswa mwami wa Edom si ya hulira mba. Na ndiyo va hila vatumwa ku mwami wa Moabu navutswa si ya bugirira mba: na Israeli va menya mu Kedesh.

¹⁸ Kunangwa va vita mu kyangalangwi, nokuvodonkana kivala kya Edom, nekivala kya Moabu, na va vita ku luvega lwevugwi lwekivala kya Moabu, na va lomba hokusosa havo engereka wa Arnon, navutswa va vula kwingira mu lwako lwa Moabu, kigira Arnon gwa li lwako lwa Moabu.

¹⁹ Na Israeli va tuma vatumwa ku Sihon, umwami wa Vaamori, mwami wa Heshibon; Israeli va mu volera, Ku ku goonya, u ku he munwa kuvitire mkivala kikyo kuduka hango hange.

²⁰ Navutswa Sihon si ya suuvira Israeli va vite mu lwako lwilwe; navutswa Sihon ya vungidza avandu veve vosi halala, na va singeridza mahema gavo mu Jahazu, na va lwana na Israeli.

²¹ Na Yahova, Nyasaye wa Israeli, ya vika Sihon navandu veve vosi mmukono gwa Israeli, na va va kuya: na Israeli va gumira kivala kyosi kya Vaamori, avamenyi mu kivala yikyo.

²² Na va gumira tsinzako tsyosi tsya Vaamori, kutwula Arnon kuduka Jaboku, kutwula ku kyangalangwi kuduka Yordani.

²³ Na kalunu Yahova, Nyasaye wa Israeli, ya lanya Vaamori va twule imbiri wavandu veve Israeli, na ive wenyanga kuvavugula?

²⁴ Si ga dukanga ive kuvugula kya Kemoshu munyasaye wowo ya ku ha kuvugula? Ni ndiyo vosi ava Yahova Nyasaye wetu ya lanya va twule imbiri wetu, kwinye ku la va vugula.

²⁵ Na ive kalunu u veye mulahi kuvita Balaki, mwana wa Ziporu, mwami wa Moabu? Uyu ya hing'ana na Israeli, kinga kulwana kuvo?

²⁶ Inyinga Israeli va menya Heshibon na madala galyo, nomu Aroeri na madala galyo, nomu madala gosi ga li himbi ku mugera gwa Arnon, mihiga tsimia tsivaka; kigira ki mwinye mwa vula kuganyola mu tsinyinga yitsi?

²⁷ Kunangwa si nda kola budamano ku ive, navutswa ive wa nkolera ubudamano kulwana ninze: Yahova, Mukalagi, a ve mukalagi kandi lero hagati ha avana va Israeli navana va Amon.

²⁸ Navutswa mwami wavana va Amon si ya hulira makuva ga Jefetha ga ya tuma kuye.

²⁹ Hene yaho Roho wa Yahova yadza ku Jefetha, naye ya vita mu Gileadi na Manase, na ya vita mu Mizipa ya Gileadi, nokutwula ha Mizipa ya Gileadi ya vita kutsia ku avana va Amon.

³⁰ Na Jefetha ya lagana na Yahova, na a vola, Nu u va nu u vika avana va Amon mmukono gwange ligali,

³¹ hene yaho ga la va, ku vyosi ki twula mu viliango vyenyumba yange kuvugana ninze, lwa ngereranga nemirembe kutwula ku avana va Amon, kindu l yiki ki la va kya Yahova, naho nda ki haana ki ve kihaanwa kyokusambwa.

³² Ma Jefetha ya vita kutsia ku avana va Amon kulwana navo; na Yahova ya va vika mmukono gwigwe.

³³ Naye ya va kuya kutwula Aroeri kuduka Minithu, ga veye madala makumi gaviri, nokuduka Abeli-keramim, ya va kuya neliita linene. Ni ndiyo avana va Amon va guutwa imbiri wavana va Israeli.

³⁴ Na Jefetha ya duka Mizipa ku inyumba yeye; henza, mwana wewe mukana ya twula kumwaganira, naye ya li nesugudi nobukino: naye ya li mwana wewe muderwa; si ya li nomwana muyai kinga mwana mukana navutswa uyu.

³⁵ Kunangwa lwa ya mu lola, ya tandula tsingubo tsitsye, na a vola, O ivani i, mukana wange ive u ngehidzi ligali, na u veye mulala ku yavo ava nyankidzanga; kigira inze nkunuliye Yahova munwa gwange, na si nyala kwirana inyima.

³⁶ Nomwana wewe ya mu volera, Dada wange, u kunuliye Yahova munwa gugwo; nkola kuli yago aga twuli mmunwa gugwo, kigira Yahova u ku vanziye kisaalya ku vasigu vovo, kali ku avana va Amon.

³⁷ Naye ya volera dada wewe, Inkuva yiyi i kolwe ku inze: u ndeke ntsie myeli gyiviri, nduke kutwula nokutsia yiyi neyiyi ku vigulu, nokusyomira ulukana lwange, inze navakye vange.

³⁸ Na dada wewe ya mu volera, Tsia. Na ya mu tuma ihale kuduka myeli gyiviri: naye ya tsia, uyu navakye, na ya syomera lukana lwilwe mbigulu.

³⁹ Na ga duka ku kiheri kyemyeli gyiviri zana, yirana ku dada wewe, wa mu kolera kuli lilagana lilye lya ya laga: naye ya li na kikiri kumanya musatsa. Na gya li miima mu Israeli,

⁴⁰ avakana va Israeli va tsia muhiga nomuhiga kwidzulitsa mwana wa Jefetha Mugileadi madiku gane ku muhiga.