Vahebraina 13 - KITABU KITAKATIFU

¹ Livanzana lya avamitu li menye.

² Mu tivirira kulang'aminya ubuyanzi ku vageni: kigira ku yaga avalala vingiridza tsingelosi ni va ta manya.

³ Mwidzulitse avahambe kuii mu boheywi halala navo; kandi yavo ava kupidzeywi kivi, kuli mu veye mu mubiri.

⁴ Lisererana li veye nelidzominywa ku vosi, nobugono bu ta va nobudamano: kigira ava tsia mbakana navaheyi Nyasaye a la va kalagira.

⁵ Mu ta va neliva lyokuyanza ubutugi; kandi mu dukane nevindu vya mu veye navyo: kigira mwene ya vola, Inze ligali si nda ku leka mba, kandi ligali si nda vukana ku ive mba.

⁶ Kunangwa ku luvirira kuvola, Mwami a veye mukonyi wange; si nda tia mba: Avandu va la nkolera ki?

⁷ Mwidzulitse yavo ava mwimiranga, ava mu volera likuva lya Nyasaye; nokuluta lihera lyeligenda lyavo, mwege ku lisuuvira lyavo.

⁸ Yesu Kristo a veye lero nolwave, yee, kuduka mihiga nemihiga, mulala mwere.

⁹ Mu ta gotidzwa namegidzo tsing'ano tsindi megidzo mageni: kigira nu bulahi mwoyo gu dinyeridzwe netsimbabasi; si ku li ku vyokulia, vya yavo va genda navyo vya vula kuvaletera ubukonyi.

¹⁰ Ku veye nobwali obwa yavo ava lindanga lihema lyelivugana, va vula kuva netsingulu kulia ku.

¹¹ Kigira tsinyama tsya masahi gatsyo, gomusalisi munene a leta mu hatakatifu kigira ubwoni, imibiri gyatsyo gya sambirwa kyova wamahema.

¹² Kigira yaga Yesu kandi, a duke kutakasa avandu kigira masahi gege, ya salirira kyova wolugaga.

¹³ Kunang va kalunu ku twule ku duke ha a veye kyova wamahema, ni ku gingi linyegwa lilye.

¹⁴ Kigira hano si ku veye nelidala li menya, navutswa kwenyanga lidzanga.

¹⁵ Kunangwa ku hilire Nyasaye ku uyu, kisyuviriru kyelidzominya kazozo, livola li veye makuyu geminwa gyeyamanga lieta lilye.

¹⁶ Navutswa mu tivirira kukola bulahi nokusanga, kigira visyuviriru kuli yivi Nyasaye a yanzidzangwa navyo.

¹⁷ Mu hulire ava mwimiriranga, mwegehidze kuvo; kigira va henzanga ku myoyo gyenyu, kuli ava li haana livalidza; va duke kuhaana nobuyanzi, si ga li nelihuguma: kigira yaga si ga li nobukonyi ku mwinye.

¹⁸ Mu ku saalire: kigira ku lola ku veye nomwoyo mulahi, ni kwenya kutumekira nu bulahi vindu vyosi.

¹⁹ Kandi mmu tsuva ligali kukola ndiyo, nduke kwiranywa ku mwinye bwangu.

²⁰ Kalunu Nyasaye wemirembe wa leta mu vakudzu Mwayi Munene wamagondi, mu masahi gelilagana lyemihiga nemihiga, Mwami wetu Yesu,

²¹ a mu kole mu ve ava dukiru mu vindu vyosi vilahi kukola ubulaliri bwibwe, nokukola mu mwinye ki yanzekanga imbiri wewe, ku Yesu Kristo; wobukumi bu ve kuye mihiga nemihiga. Amini.

²² Navutswa mmu tsuva, avamitu, mwikudzire ku likuva lyelitsuvwa: kigira mmu ng'odeye mu makuva makekeke.

²³ Mu manye uyu amitu wetu Timoteo u mali kubohololwa; na a va na a duka bwangu, nda lolana na mwinye halala naye.

²⁴ Mu chelidze yavo vosi ava mwimiriranga, navatakatifu vosi. Yavo ava Italia va mu chelidza.

²⁵ Tsimbabasi tsi ve nemwinye mwosi. Amini.