Vagalatia 6 - KITABU KITAKATIFU

¹ Avamitu, mundu na a hyoye ku lihyola lyosi, mwinye ava veye va Roho mwirannye wa zana a ve mulahi, mu roho gwobuhooma; welinde mwene gase na ive u la geridzwa.

² Mu konyane ku maliduhu mundu sa mulala nowakye, na ndiyo mu la dukidza miima gya Kristo.

³ Kigira mundu ni yeganagana a veye kindu inyinga ya a ta va kindu, yegada mwene.

⁴ Navutswa avandu vosi sa mulala yegeridze ku miyinzi gyigye mwene, hene yaho a la va neliidzominya mwene, si ga li ku gyowundi.

⁵ Kigira avandu vosi sa mulala a la ginga musigo mu ene.

⁶ Navutswa uyu wegidzangwa likuva a kole lisanga na uyu wegidzanga ku vindu vyosi vilahi.

⁷ Mu ta gadwa; ari Nyasaye a kolerwa kihenyahenye mba kigira kyomundu a taga a la gesa kya zana.

⁸ Kigira uyu u taga ku mubiri gwigwe mwene, a la gesa ku mubiri ubwoneku; navutswa u taganga ku Roho a la gesa ku Roho livamwoyo li ta hera mba.

⁹ Kwinye ku ta kudza mwoyo ku likola bulahi: kigira ku la gesa ku tsinyinga tsyalyo, ni ku vula kukudza mwoyo.

¹⁰ Kunangwa inyinga ku va nobwiyangu, ku kole bulahi ku vandu vosi, kandi ligali ku viko velisuuvira.

¹¹ Mu lole kuli tsinduguta tsi veye tsinene tsya mmu ng'odera nomukono gwange mwene.

¹² Kuyava avenya kuloleka bulahi mu vindu vyomubiri, va mu niga kukevwa; va vule kukupidzwa kivi kigira musalaba gwa Kristo, kigira ni yiki kyeng'ine.

¹³ Kigira yava ava kevangwa si va londa lilaga avene; navutswa venya mu kevwe va duke kwiidzominya ku liva lyemibiri gyenyu.

¹⁴ Navutswa li ve hale ku inze liidzominya ni li ta li ku musalaba gwo Mwami wetu Yesu Kristo, kugwo vyelirova vi gwiye vibambe ku inze, na inze ngwiye mubambe ku vyelirova.

¹⁵ Kigira likevwa si li veye kindu, kandi livula kukevwa, navutswa kilombe kihya.

¹⁶ Ku yava ava londa miima yigyi gyekilombe kihya, mirembe gyi ve kuvo, kandi tsimbabasi, kandi ku Vaisraeli va Nyasaye.

¹⁷ Kutwula kalunu mundu a ta nkolera bubi; kigira ngingi ku mubiri gwange tsimbala tsya Yesu.

¹⁸ Tsimbabasi tsyo Mwami wetu Yesu Kristo tsi ve na roho gyenyu, vamitu. Amini.