Vagalatia 5 - KITABU KITAKATIFU

¹ Mu libohololwa lya Kristo ya ku boholola nalyo, mu singire mu budinyu, kandi mu ta gumirwa hali kaviri nenira yobutugwa.

² Henza, inze Paulo mmu volera, mwinye ni mu kevwa, Kristo si a la mu konya kali hakuzu.

³ Yee, mmu lolekidzira kandi ku vosi u bugirira likevwa, a veye neligovi a duke kukola lilaga lyosi.

⁴ Mwinye avenyanga kuvolwa kuva nobulungi kigira lilaga mwavukannyeywi na Kristo: mu gwiye kutwula mu tsimbabasi.

⁵ Kigira kwinye ku lindiririra na Roho, lisuuviridzwa lyobulungi kigira lisuuvira.

⁶ Kigira mu Kristo Yesu likevwa si li konya kindu, kinga livula kukevwa; navutswa lisuuvira li kolanga miyinzi kigira ubuyanzi.

⁷ Mwa li ni mu nyagula bulahi; ibwaha wa mwigalira mu ta hulira ageligali?

⁸ Ligoonya yili si lya twula ku uyu u langa mwinye.

⁹ Mamera makekeke ga duvula lihumbi lyosi.

¹⁰ Mbeye nelisuuvira ku mwinye mu Mwami, si mu la va nomwoyo gundi kali mulala: navutswa ku vosi uyu u mu kupidza kivi a la va nelikalagirwa lilye mwene.

¹¹ Navutswa inze, avamitu, ni mba ni nzilwadza likevwa kuduka kalunu, kigira ki ndambidzangwa kuduka kalunu? Kunangwa likigitalidza lyomusalaba li heri.

¹² Nkano va lyekala avene, yava ava mu hendidzanga myoyo.

¹³ Kigira mwinye avamitu, mwa Iangwa mu nyole libohololwa; navutswa libohololwa lyenyu li ta va ubwiyangu bwomubiri, navutswa mu tumikirane avene navene nobuyanzi.

¹⁴ Kigira lilaga lyosi li dukidzireywi mu likuva lilala, nalyo ni yili, U yanze mutende kuli weyanza mwene.

¹⁵ Navutswa ni mu lumana nokulitsana avene navene, mwelinde gase mu la malirana avene navene.

¹⁶ Navutswa mbola, Mu gende netsingulu tsya Roho, mu la vula kudukidza likayirwa lyomubiri.

¹⁷ Kigira mubiri gu kayirangwa, ma gu tamana na Roho, kandi Roho a tamana nomubiri; kigira yivi vi tamana vyene na vyene; mbuli kukola vindu vya mwenya.

¹⁸ Navutswa Roho na a mwimirira, si mu boheywi mu lilaga.

¹⁹ Kunangwa miyinzi gyomubiri gyi veye habulavu, nagyo: namalaya, nekifwabwi, nokutsia mbakana,

²⁰ nokusigamira misambwa, nobukumu, nobusigu, nelihing'ana, nembodoka, nobutima, namahangali, nokwavukana, nokwekala vidieli,

²¹ nelikendeka, nobuhambiki, nevindu vyoluyai, nevindu kuli yivi; ku vindu yivi ntanga kumuvolera kuli wa nda mu volera, yava ava kolanga vindu kuli yivi si va li nyola ubwami bwa Nyasaye.

²² Navutswa likuyu lya Roho li veye ubuyanzi, nobusangali, nemirembe, nobwikudziri, netsimbabasi, nobulungi, nobusuuvirifu,

²³ nobuhokya, nokwelinda; si ha li nemiima gu sulana namakuva kuli yaga.

²⁴ Kandi yava ava veye va Kristo Yesu va mali kubambwa mubiri halala nelyegombwa lyagwo lidamano nelikayirwa lyagwo.

²⁵ Ni ku va ni ku veye mwoyo ku Roho, kandi ku gende netsingulu tsya Roho.

²⁶ Ku tenya liidzominywa lya vutswa nokuhing'ana avene navene, nokukolerana imbodoka avene navene.