Matayo 3 - KITABU KITAKATIFU

¹ Mmadiku yago Yohana Mbatidzi yadza ni yilwadza mwigendanyama lyo Buyuda, na a vola,

² Mweganire; kigira ubwami bwomigulu bu veye himbi.

³ Kigira uyu niye wa Isaya mprofeti ya vola kuye na a vola Mwoyo gwomulala a hanzukanga mwigendanyama, Mu lombe inzira yo Mwami, Mu lungikidze mihanda gyigye.

⁴ Yohana mwene ya li nengubo yobwoya bweng'amia, ni yeboha lukova mkikengi kikye; kandi vyokulia vivye vya li tsisigi nobwuki bwomulitu.

⁵ Hene yaho va twula Yerusalemi no Buyuda bwosi neki vala kyosi kya li himbi Yordani,

⁶ ni va tsia ku Yohana na a va batidza mmugera gwa Yordani, vivuula ubwoni bwavo.

⁷ Navutswa lwa ya lola vanyingi ku Vafarisayo na Vasadukayo vadza ku libatidza lilye, ya va volera, Mwinye avana vetsinzoka, ibwaha ya mgerihidza mwiruke ubuvihiridzi budza nga?

⁸ Mwame makuyu ga dukana nelyeganira:

⁹ mu ta ganagana mkiritu, mu vole, Ku veye na guga wetu Abrahamu: kigira mmu volera, Nyasaye a nyala kutwulidzira Abrahamu avana ku magina yaga.

¹⁰ Kandi kali kalunu imbadzi i vike ywi mvitinya vyemisala: ku misala gyosi gu tama makuyu malahi gu temagwa, gu tebwa mmuliru.

¹¹ Ligali inze mmu batidza mmadzi mu duke kweganira; navutswa u nonderera a veye netsingulu kuvita inze, vilatu vivye si ndukana kumugingira: uyu a la mu batidza mu Roho Mtakatifu nomu muliru.

¹² Kiseseru kikye ki veye mmkono gwigwe, kandi a la lavidza ulodze lwilwe ligali; nengano yeye a la tera mkideera navutswa mkuudzi a la samba nomuiiru gu ta simika.

¹³ Ma Yesu yadza na a twula Galilaya na a duka Yordani ku Yohana, a mu batidze.

¹⁴ Navutswa Yohana yenya kumugaya, na a vola, Inze nobulahi mbatidzwe nive nkani udze ku inze?

¹⁵ Navutswa Yesu ya tivula na a mbolera, Leka kalunu: kigira nobulahi kudukidza ndi ubulungi bwosi. Hene yaho ya mleka.

¹⁶ Na Yesu, lwa ya batidzwa, ya twula mmadzi nonoho: kandi henza, ligulu lya mkunulirwa, na a lola Roho wa Nyasaye yika ni yadza kuye kuli likuulu;

¹⁷ kandi henza, munwa gwa twula mwigulu ni gu vola, Uyu no Mwana wange, muyanzi wange wa nyanza.