Matayo 21 - KITABU KITAKATIFU

¹ Lwa va duka himbi ne Yerusalemi, ni va duka Bethfage, mu kigulu kya Mizeituni, hene yaho Yesu ya tuma avegidzwi veve vaviri,

² na a va volera, Tsii mu lidala li veye ha engereka na mwinye bwangu mu la nyola isukiri i boheywi, nekimoli kyesukiri halala nayo: mu tsi boholole mu ndetere.

³ Kandi mu ndu na a mu teva kindu mu la vola, Mwami a tsyenya; nonoho a la tsi leta.

⁴ Ga kolwa ndi ga duke agomprofeti ya vola, na a vola,

⁵ Mu volere mkana wa Zioni, Henza, Mwami wowo yadza ku ive, Muhooma, u nini kwisukiri, Noku kimoli kyesukiri.

⁶ Avegidzwi va tsia ni va kola kuli Yesu ya va laga;

⁷ ni va leta isukiri nekimoli kyayo, ni va vika ku tsingubo tsyavo; naye yikala ku.

⁸ Vanyingi vekidurna vaala tsingubo tsyavo ku inzira; na vandi va temaga tsisya ku misala, ni vaala ku inzira.

⁹ Kiduma kya mwimirira, na kya londa inyima, va hanzuka, ni va vola, Hozana ku mwana wa Daudi u gasi yadza ku lieta lyo Mwami; Hozana mwigulu.

¹⁰ Lwa ya mala kwingira Yerusalemi, lidala lyosi lya vukidzwa, ni va vola, Ibwaha uyu?

¹¹ Na viduma vya vola, Uyu nomprofeti, Yesu, wa Nazareti lya Galilaya.

¹² Yesu yingira mu litempeli lya Nyasaye, na a kunga vosi va gula ni va kirannya mu litempeli, na a kunaminya tsimeza tsya va kirannya tsishilling, nevisako vya va li ni va gula makuulu;

¹³ na a va volera, Ga ng'odwa, Inyumba yange i la langwa inyumba yokusaala: navutswa mwinye mu gi kola i ve luhang'aywa lwavivi.

¹⁴ Na vaboku navaleema vadza kuye mu litempeli; na a va honnya.

¹⁵ Navutswa avasalisi vanene navang'odi lwa va lola vindu vyokugennya vya ya kola, navana va li ni va hanzuka mu litempeli, ni va vola, Hozana ku mwana wa Daudi va vihirirwa,

¹⁶ ni va mu volera U hulira aga yava va vola? Yesu ya va volera, Yee: si mwa soma, Ku munwa gwavana nogwa va nuna, u lombi ubwidzominyi?

¹⁷ Na a va leka, na a twula mu lidala kutsia Betani, na a gona vo.

¹⁸ Mugamba lwa yirana ku inzira kutsia mu lidala, ya li nenzala.

¹⁹ Na a lola mkuyu ku inzira ha luvega, na a tsia kugwo, navutswa si ya nyola ku kindu mba, amatu geng'ine; na a gu volera, Ga ta va makuyu ku ive inyinga yosi. Nonoho mkuyu gwa niala.

²⁰ Avegidzwi lwa va gu lola, va genya, ni va vola, Mkuyu gu niaye ndi bwangu?

²¹ Yesu ya tivula na a va volera, Ligali mmu volera, Mwinye ni mu veye nelisuuvira, mu ta hayahayidza si mu la nyala kukola kuli ga kolwa ku mkuyu geng'ine, navutswa kali mu duka kuvolera kigulu yiki, Ive u gingwe u sikiswe mu inyanza, ga la kolwa.

²² Na vindu vyosi vya mu teva mu lisaala nelisuuvira, mu la vi nyola.

²³ Lwa ya mala kuduka mu litempeli, avasalisi vanene navakulundu vavandu vadza kuye lwa yegidzanga, ni va vola, Ive u kola vindu yivi netsingulu ki? Kandi ibwaha wa ku ha tsingulu yitsi?

²⁴ Yesu ya tivula na a va volera, Inze kandi nda mu teva liteva lilala; ni mu volera inze yili, kandi nda mu volera tsingulu tsya nkolera vindu yivi.

²⁵ Libatidza lya Yohana, lya twula ha li ki? Lya twula mwigulu naho ku vandu? Navo va ganagana ni va volerana, Ni ku vola, Mwigulu; a la ku volera, Kigira ki mwa vula kumubugirira?

²⁶ Navutswa ni ku vola, Ku vandu; ku tidza kiduma; kigira vosi va vola, Yohana nu mprofeti.

²⁷ Kunangwa va tivulira Yesu, ni va vola, Si ku manya mba. Na Yesu ya va volera, Kandi inze si mmu volera tsingulu tsya nkolera vindu yivi.

²⁸ Navu tswa mu vola ki? Mundu ya li navayai vaviri; ni yadza ku wambiri na a mu volera, Mwana, lero tsia u yinzire mu kizabibu.

²⁹ Navutswa ya tivula na a vola, Si ntsia mba: navutswa inyima yeganira na a tsia.

³⁰ Yadza ku wanyima na a mu volera ndiyo kandi. Naye ya vola, Ntsitsa, Mwami: navutswa si ya tsia mba.

³¹ U li ha ku vaviri yava wa kola ubulaliri bwa ise? Va vola, Wambiri. Yesu ya va volera, Ligali mmu volera, avasololi vobushutu navaheyi vingira mu bwami bwa Nyasaye imbiri wenyu.

³² Kigira Yohana yadza ku mwinye ku inzira yobulungi, na mwinye si mwa mu suuvira mba; navutswa avasololi vobushutu navahevi va mu bugirira: na mwinye lwa mwa ga lola si mweganira inyima, mu duke kumusuuvira.

³³ Mu hulire lugano lundi: Ha li nomundu mwene inyumba wa simika kizabibu, na a lomba lugaga, na a yava mu lina lyokukamira mu mazabibu, ni yombaka kitaradzi, na a ha avalimi, na a tsia mu kivala kindi.

³⁴ Lwa muhiga gwa mazabibu gwa duka himbi ya tuma avatugwa veve ku valimi, kuvugula mazabibu gege.

³⁵ Avalimi va vugula avatugwa veve, ni va kuya mulala, ni viita wundi, ni va lasa wundi namagina.

³⁶ Kandi va tuma avatugwa avandi avanyingi kuvita ku vambiri: ni va kola ndiyo kuvo.

³⁷ Navutswa inyima ya tuma mwana wewe kuvo, na a vola, Va la tia mwana wange.

³⁸ Navutswa avalimi lwa va lola mwana wewe va volerana, Uyu nu mhili womwandu, hambi, ku mwiite, ku hile vindu vivye.

³⁹ Ni va mu gumira ni va mu twulidza mu kizabibu, ni va mwiita.

⁴⁰ Kunangwa mwami wekizabibu lwa a li duka a la kola ki ku valimi?

⁴¹ Va mu volera, A lononnya muna avandu vadamano yavo, na a ha avalimi avandi mulimi gwigwe, ava li mu letera mazabibu mu mihiga gyago

⁴² Yesu ya va volera, Si mwa soma mang'oda, Ligina lya vombaki vambakana, Yili lya duka kuva mutwe gwoiwiga; Yaga ga twula ku Mwami, Ga veye gokugennya mu tsimoni tsyetu?

⁴³ Kigira yaga mmu volera, Mu la nyagwa ubwami bwa Nyasaye bu hebwe ihiri i leta makuyu gabwo.

⁴⁴ Uyu u gwa kwigina yili a la vunika: navutswa wa li li gwira, li la mu salannya kuli lugukyi.

⁴⁵ Avasalisi vanene na Vafarisayo lwa va hulira tsing'ano tsitsye, va manya a vola kuvo.

⁴⁶ Kandi lwa venya kumgumira, va tia viduma, kigira va vola a veye muprofeti.