Luka 2 - KITABU KITAKATIFU

¹ Mu madiku yago munwa gwa twula ku Kaisari Augusto kung'oda ameta gavandu mu vivala vyosi.

² Nalyo lya li ling'oda lyokutanga, inyinga Kwirinio ya li mwami wa Siria.

³ Vosi va tsia kung'odwa mu madala gavo gene.

⁴ Kandi Yosefa yanegira kutwula Galilaya, mu lidala lya Nazareti, na a tsia Buyuda, mu lidala lya Daudi, lya langwa Bethlehemu, kigira ya li wenyumba naviko va Daudi;

⁵ a tsie kung'odwa halala na Maria mukali wewe wa ya kwa, naye a veye inda.

⁶ Lwa va menyayo, madiku gelivula lilye ga duka.

⁷ Kandi yivula mwana muyai wewe wambiri; na a mu lingira mu tsingubo tsyomwana, na a mwalira ku mulinga gwetsing'ombe tsi lira ku, kigira si ha li nobugono mu inyumba yavageni.

⁸ Avayi va li ho mu kivala zana va linda kyayo kyavo mu kyayiru ubudiku.

⁹ Kandi ingelosi wo Mwami ya singira ha va li, nobukumi bwo Mwami bwa ng'ereng'ana kuvo tsimbega tsyosi: kandi va tia ligali.

¹⁰ Ingelosi ya va volera, Mu ta tia; kigira henza, mmu letera amakuva malahi gobuyanzi bunene ga la va ku vandu vosi:

¹¹ kigira lero Muho nnyi wenyu naye a veye Kristo Mwami, wivuleywi mu lidala lya Daudi.

¹² Kandi yiki ki la va kiloleru ku mwinye: Mu la nyola akana ka lingeywi mu tsingubo tsyomwana, kaleleywi mu mulinga gwe tsing'ombe tsi lira ku.

¹³ Nonoho ndi va li ho halala nengelosi kiduma kyelihe lya igulu, vidzominya Nyasaye, ni va vola.

¹⁴ Ubukumi bu ve igulu migulu ku Nyasaye. Nemirembe ku kivala ku vandu ava ya yanza.

¹⁵ Tsingelosi lwa va mali kutwula kuvo kutsia migulu, avayi va volerana avene Kalunu ku tsie kuduka kali Bethlehemu ku lole likuva yili wa lya li kuva, lyo Mwami a ku voleye.

¹⁶ Ma va tsia bwangu, ni va nyola Maria na Yosefa, nakana kaleleywi mu mulinga.

¹⁷ Lwa va ka lola, va vola amakuva ga va volerwa ku akana yaka.

¹⁸ Vosi ava hulira va genya vindu vyavayi va va volera.

¹⁹ Navutswa Maria ya vika amakuva yaga na a ga ganagana mu mwoyo gwigwe.

²⁰ Avayi virana, va kuminya ni vidzominya Nyasaye ku makuva gosi ga va hulira nokulola, kuli ga va volerwa.

²¹ Madiku gatanu na gavaka, lwa ga duka ga va mu kevera mu, lieta lilye lya gulikwa YESU, kuli wengelosi ya mu gulika, na a kikiri kuverekwa.

²² Amadiku gavo gokwetakasa kuli lilaga lya Musa, lwa ga duka vane gira naye Yerusalemi, kumusingiridza imbiri wo Mwami

²³ (kuli ga ng'odwa mu lilaga lyo Mwami, Ave kisatsa vosi vigula munda mwa mama va la langwa avatakatifu vo Mwami),

²⁴ nokutwulidza kindu kyokusalisa, kuli ga volwa mu lilaga lyo Mwami, Amakuulu gaviri gombulimu, kinga makuulu matuge gaviri.

²⁵ Henza, ya li ho mu Yerusalemi mundu, wa langwa lieta lilye Simeoni; mundu uyu ya li mulungi wa tia Nyasaye, wa linda lihodzeridzwa lya Israeli: kandi Roho Mutakatifu ya li kuye.

²⁶ Kandi Roho Mutakatifu ya mu vuulira, si a li lola likudza na a kikiri kulola Kristo wo Mwami.

²⁷ Naye yadza mu Roho mu litempeli: avivuli lwa vingiridza mwana Yesu, va duke kumukolera kuli miima gyamalago,

²⁸ hene yaho ya mu vugula mu makono gege ni yidzominya Nyasaye, na a vola

²⁹ Kalunu, Mwami, u he mutugwa wowo munwa a tsie, kuli likuva lilyo, nemirembe

³⁰ Kigira tsimoni tsyange tsi mali kulola ubuhonnyi bubwo,

³¹ Bwa lombeye imbiri wa vandu vosi;

³² Ubulavu bwokuvuulira Tsihiri, Kandi ubukumi bwavandu vovo Israeli.

³³ Kandi Yosefa na mama wewe va genya vindu vya volwa kuye:

³⁴ kandi Simeoni ya va saavira ubu lahi, na a volera Maria mama wewe, Henza, mwana uyu u vikeywi, ava nyingi ku Israeli va gwe kandi va vuke; kandi a ve kiloleru ki li hangalidzwa;

³⁵ yee kandi kivavi ki la ku tumita ku mwoyo gugwo mwene tsiganagani tsyemyoyo minyingi tsi duke kuvuulwa.

³⁶ Ha li nomulala, Anna muprofeti, mukana wa Fanueli, wehiri ya Aseri (uyu u mali kuduka imihiga minyingi, na a menya nomu sata mihiga gyitanu na gyiviri ku twula inyinga ya ya li mugima,

³⁷ kandi ya li mukunzakali imihiga gyi duka amakumi gatanu na gavaka nemihiga gyine), wa vula kutwula mu litempeli, na a sigamira halala nokuhonga lilia nelisaala ubudiku nombasu.

³⁸ Uyu yingira isaa yeyo ni yidzominya Nyasaye, na a volera go mwana ku vosi ava linda ubu honnyi bwe Yerusalemi.

³⁹ Lwa va mala vindu vyosi vya lagwa nelilago lyo Mwami, virana Galilaya, ni va tsia mu lidala lyavo, Nazareti.

⁴⁰ Mwana ya viruka, na a dasa tsingulu, ni yizula ubugeeri: kandi ubuyanzi bwa Nyasaye bwa li kuye.

⁴¹ Avivuli veve va tsia imihiga gyosi Yerusalemi mu lilia lye lipasaka.

⁴² Lwa ya duka imihiga li kumi na gyiviri, vanegira kuli miima gwelilia;

⁴³ lwa va mala madiku ni virana, muyai Yesu ya tigala Yerusalemi; kandi Yosefa na mama wewe si va manya;

⁴⁴ navutswa va ganagana a veye mu kigaanda, va tsia ulugendo lwelidiku lilala; ni va mwe nya mu vandu vavo nomu valina vavo.

⁴⁵ Lwa va vula kumulola, virana Yerusalemi, ni va mwenya.

⁴⁶ Kandi inyima wamadiku gavaka va mu nyola mu litempeli, ni yikaye hagati havegidzi, na a va huliridza na a va teva mateva.

⁴⁷ Navo vosi ava mu hulira va genya ubugeeri bwibwe nelitivula lilye.

⁴⁸ Kandi lwa va mu lola va genya, na mama wewe ya mu volera, Mwana wange, kigira ki u ku kolera ndi? Henza dada wowo na inze kwa li ku kwenya nobuvereri.

⁴⁹ Ya va volera, Kigira ki mwa nyenya? Si mu manya no bulahi inze mbe ku vindu vya Dada wange?

⁵⁰ Si va hulira lugano lwamakuva ga ya va volera.

⁵¹ Kandi ya sulunguta navo na a duka Nazareti; ni yegehidza kuvo: na mama wewe ya vika amakuva yaga gosi mu mwoyo gwigwe.

⁵² Yesu ya dasa ubugeeri, na a viruka, na a dasika mu buyanzi bwa Nyasaye nobwavandu.