Litanga 3 - KITABU KITAKATIFU

¹ Kunangwa inzoka ya li nobugeeri bwobugadi kuvita tsinyama tsyosi tsya Yahova Nyasaye ya li kulomba. Nayo ya volera mukali, Yee, Nyasaye a voye, Mu ta lia ku misala gyosi gyomulimi?

² Na mukali ya volera inzoka, Ku makuyu gemisala gyomulimi ku nyala kulia:

³ navutswa ku makuyu gomusala gu veye hagati homulimi, Nyasaye a voye, Mu ta lia ku, kinga kudira ku, gase mu la kudza.

⁴ Na inzoka ya volera mukali, Ligali si mu la kudza mba:

⁵ kigira Nyasaye a manya ku lidiku lya mu lia ku, tsimoni tsyenyu tsi la kunulwa, na mu la va kuli Nyasaye, mu limanya ubulahi nobudamano.

⁶ Na mukali lwa ya lola musala zana gu veye mulahi kulia, nagwo kandi gu yanzidza tsimoni, na kandi nomulahi kugerihidza, ya vugula ku makuyu gagwo, na a lia; kandi ya ha musatsa wewe halala naye, na a lia.

⁷ Nonoho tsimoni tsyavo vombi tsya kunuka, navo va manya va veye kyahonyo; na va nava amatu gemisala gamakuyu, na velombera avene tsingubo.

⁸ Na va hulira mwoyo gwa Yahova Nyasaye a gendanga mmulimi inyinga yembuudza yomgolova: na musatsa nomukali wewe vevisa mmoni mwa Yahova Nyasaye hagati ha misala gyomulimi.

⁹ Na Yahova Nyasaye ya langa Adamu, na a mu volera, U veye haliha?

¹⁰ Naye ya tivula, Nda hulira mwoyo gugwo mmulimi, ni ntia kigira nda li kyahonyo; ma nzivisi.

¹¹ Naye ya mu teva, Ni bwaha wa ku volera u veye kyahonyo? U mali kulia ku musala gwa nda ku laga u ta lia ku?

¹² Adamu ya vola, Mukali wa ive wa mpa kuva halala ninze, ya mpa agomusala ma nda lia.

¹³ Ma Yahova Nyasaye ya teva mukali, Ni kindu ki kya u koli? Na mukali ya vola, Inzoka ya ngada ni ndia.

¹⁴ Ma Yahova Nyasaye ya volera inzoka, Kigira u koli likuva yili, u laameywi kuvita mitugu gyosi, nokuvita tsinyama tsyosi tsyombulimu; u la molera inda yoyo, kandi u la lia ulugukyi madiku gosi gelimenya lilyo:

¹⁵ kandi nda vika ubusigu hagati hoho nomukali, noku visukululwi vivyo nevisukulwi vivye: a la shonolanya mutwe gugwo, nive u la shonolanya liki lilye.

¹⁶ Kandi ya volera mukali, Nda kiridza ligali ubusaliri bubwo na livereka lilyo; u livula avana nobusaliri; kandi likayirwa lilyo li la yeka ku musatsa wowo, naye a lameha ku ive.

¹⁷ Kandi ya volera Adamu Kigira ive u huliye livola lyomukaii wowo, na u liye ku musala, gwa nda ku laga, ni mbola, U ta lia kugwo: marova ga laameywi kigira ive; u la lia vyokulia vivyo mu liyinzira lidinyu madiku gosi gelimenya lilyo lyosi;

¹⁸ kandi ga la letera ive amafwa namatagalu, na u la lia amatu gomulimi;

¹⁹ mu lugeri lwommoni mumwo u la lia vyokulia, kuduka ive u lirana mu marova; kigira wa twulidzwa mugo: kigira u veye ulugukyi, na u lirana mu lugukyi.

²⁰ Na Adamu ya langa lieta lyomukali wewe, Hawa; kigira a veye mama wa vosi va veye mwoyo.

²¹ Na Yahova Nyasaye ya lombera Adamu nomukali wewe tsingubo tsya masero, na a va vika.

²² Kandi Yahova Nyasaye ya vola, Henza, Adamu u gwiye kuli mulala ku kwinye, ku limanya ubulahi nobudamano; kalunu gase a la nyira mukono gwigwe, nokuvugula kandi ku musala gwelivamwoyo nokulia, nokuhindira mihiga nemihiga:

²³ kigira yaga Yahova Nyasaye ya mu twulidza mu mulimi gwa Edeni, kulima marova ga ya twulidzwa mu.

²⁴ Kunangwa ya kunga Adamu na a mu hila kyova; naye ya vika Vakerubi ku luvega lwevugwe womulimi gwa Edeni, na kivavi ki ng'ereng'ananga kya voyongana kulinda inzira yomusala gwelivamwoyo.