Kutwula 23 - KITABU KITAKATIFU

¹ U ta ginga makuva gobubehi: u ta vika mukono gugwo halala nomwoni kuva mulolekidzi wobukyamu.

² U ta londa kiduma kukola ubwoni: kandi u ta kola lilolekidza lilyo mu likuva kugirunkana nokulonda kiduma kukyaminya likalaga:

³ kandi u telidza mudedekere mu likuva lilye.

⁴ Nu u va nu u lola ing'ombe yomusigu wowo kinga isukiri yeye gotanga, ligali u giranye kuye kandi.

⁵ Nu u lola isukiri ya uyu u ku dunyiranga, musigo ni gu gwiye kuyo, na ive nkano u tegaya u vule kugikonya, ga ku dukira kugikonya halala naye.

⁶ U ta kyaminya likalaga lyomudaka mu likuva lilye.

⁷ Weyahule u ve ihale na makuva gobubehi; tiita yavo ava ta li nekindu kuvo na avalungi: kigira si nda ha avadamano ubulungi.

⁸ Kandi u ta vugula vikukula: kigira vikukula vi vakulidzanga tsimoni tsya yavo ava lolanga, nokukyaminya makuva ga avalungi.

⁹ Kandi mu ta dambidza mumenya: kigira mu manya mwoyo gwomumenya, kigira mwa li avamenya mu kivala kya Egepeti.

¹⁰ U la midza ubugutsa mu kivala kikyo mihiga gyitano na mulala, nokugesa lyama lyabwo:

¹¹ navutswa muhiga gwegitano na gyiviri ki sose nokwelemeridza; avadaka mu avandu vovo va lie: na vya va leka tsinyama tsyombulimu tsi lie. Kandi u la kola ndiyo ku mulimi gwa mazabibu, no gwemizeituni.

¹² Madiku gatanona lilala u la kola miyinzi gyigyo, na lidiku lya gatano na gaviri u la kola lisabato; ing'ombe yoyo na isukiri yoyo tsi sose, na mwana wa mukana mutugwa, na mugeni va duke kwelemeridza

¹³ kandi mu vyosi vya mmu voleye mu hulire: na mu ta tala lieta lya vanyasaye avandi, kandi li ta hulirwa mu munwa gwugwo.

¹⁴ Hali kavaka ku muhiga mulala u nombere lilia.

¹⁵ Mu la lomba lilia lyobukima bu ta li na mamera: madiku gatano na gaviri u la lagira ubukima bu ta li na mamera, kuli nda ku laga, mu inyinga ya tovolwa mu mweli gwa Abibu (kigira mu yigu wa twula mu Egepeti); kandi ha ta va nomundu u loleka imbiri wange vutswa:

¹⁶ kandi lilia lyeligesa, ubuhya bweliyinzira lilyo, bwa wa midza mu mulimi: kandi lilia lyokutera, ku kiheri kyomuhiga, lwa u vungidza miyinzi gyigyo kutwula mu mulimi.

¹⁷ Hali gavaka mu muhiga avasatsa vovo vosi va la loleka imbiri wa Mwami Yahova.

¹⁸ U ta leta masahi gesadaka yange halala nobukima bwa mamera; kandi maguta gelilia lyange ga ta tigala kuduka mugamba mba.

¹⁹ Bwokutanga bwobuhya bwomulimi gugwo u la leta mu inyumba ya Yahova Nyasaye wowo. U ta dekera kimeme mu maveere ga mama wakye.

²⁰ Henza, ntumanga ingelosi u ange imbiri wowo, a ku linde ku inzira, nokukuleta wingire ha nku lombeye.

²¹ U gelihe imbiri wewe, na u hulire mwoyo gwigwe; u ta mu vihiriridza; kigira si a li mu sameha mahyolo genyu: kigira Iieta lyange li veye muye.

²² Navutswa nu u hulira mwoyo gwigwe, noku kola gosi aga mbolanga; hene yaho nda va musigu wa avasigu vovo na musaliridzi wa yavo ava ku saiiridzanga.

²³ Kigira ingelosi wange a lemira imbiri wowo, nokukuhila wingire ku Avaamori, na Vahiti, na Vaperizi, na Avakanani, na Vahivi, na Vajebusi: kandi nda va dividza.

²⁴ U tinama kusigamira vanyasaye vavo, kinga kuvatumekira, kinga kukola kuli likola lyavo; navutswa u la va dividza ligali, na minara gyavo u la vunanya.

²⁵ Na mu la tumekira Yahova Nyasaye wowo, naye a la ku gasidzira vyokulia vivyo na amadzi gogo; kandi nda twulidza ulukudzo iu ta va hagati hoho.

²⁶ Si ha la va nowononnya livereka, kinga mugumba, mu kivala kikyo; na livalidza lyamadiku gogo nda ga dukidza.

²⁷ Nda tuma litihidza lyange imbiri wowo, na nda dividza avandu vosi ava u duka kuvo, na nda kola avasigu vovo vosi va girunkannye migongo gyavo ku ive.

²⁸ Na nda tuma mahalamba imbiri wowo, ga la kunga Avahivi, na Avakanani, na Avahiti, va twule imbiri wowo.

²⁹ Si nda va kunga nokuvatwulidza imbiri wowo mu muhiga mulala, gase kivala ki la tigala vutswa, na tsinyama tsyomigendinyama tsi la medekakukunyangidza.

³⁰ Ndava kunga nokuvatwulidza imbiri wowo galaha, galaha, kuduka ive u medeke nokulia kivala.

³¹ Na nda vika lwako lulwo kutwula Inyanza Inzakanyu kuduka ku inyanza ya Avafilisiti, kandi kutwula ku kyangalangwi ku duka ku Mugera: kigira nda vika avandu avomkivala mu mukono gwenyu; na ive u la va kunga imbiri wowo.

³² Ive u ta kola lilagana navo, kinga na avanyasaye vavo.

³³ Si va la menya mu kivala kikyo, gase va la ku kola kukolera inze ubwoni; kigira nu u va nu u tumekira avanyasaye vavo, ligali inkuva yiyi i la va mutego ku ive.