Kohelethu 10 - KITABU KITAKATIFU

¹ Tsingi tsya kudza tsi kolanga maguta gomuhomo agomulombi wevifunyanga mwayu, kuhunya ubugundu; ni ndiyo ubusiru bukekeke bu vitanga kigero kyobugeeri nelidzominywa.

² Mwoyo gwomugeeri gu veye ha mukono mulungi gwigwe; navutswa mwoyo gwomusiru gu veye ha mukono mmosi.

³ Yee kandi musiru na a tsia ku inzira, limanya lilye li gehanga, na a voleranga vosi a veye musiru.

⁴ Mwoyo gwomwa mehi ni gu vuka ku ive, u ta twula ha u veye; kigira mwoyo gwobuhokya gu hodziridzanga livihirirwa linene.

⁵ Bu veye ho ubudamano bwa ndoli isi weliuva, bu veye kuli lihyola li tanganga ku mwamehi:

⁶ ubusiru bu vikangwa mu bunene, navatugi vikala hasi.

⁷ Ndoli avatugwa va nina ku tsiparasi, navana vavami va genda ku lirova nevirenge kuli avatugwa.

⁸ Uyu u yavanga ubogo a la gwa mubwo; na uyu u hudulanga nokuvi tira mu lugaga, inzoka i la mu luma.

⁹ Ku vosi u vadzanga magina ga la mu saliridza; na uyu watanyanga misala a veye mbuhimwa kugyo.

¹⁰ Kivya ni ki ta veye nobwogi, kandi mundu na a ta hyagala bwogi bwakyo mba, hene yaho ga mu dukira kutumekira tsingulu kuvita: navu tswa ubugeeri bu konyanga ku lyegidza.

¹¹ Inzoka ni i luma ni i kikiri kuhomatidzwa, hene yaho si ha veye nobukonyi mu uyu muhomatidzi.

¹² Makuva gomundu mugeeri ga veye makuva geliverererwa; navutswa minwa gyomusiru gyi la mu mira mwene.

¹³ Litanga lyamakuva gomunwa gwigwe nobusiru; na kiheri kyelivola lilye nobulalu bwokwononya.

¹⁴ Musiru a medanga ma kuva: navutswa mundu si a manya aga li va; na ga li va lwenyima, ni bwaha u nyala kumuvolera?

¹⁵ Lididikana lyavasiru li va luhidzanga sa mulala; kigira si a manya kuli a nyala kutsia ku lidala.

¹⁶ O bayaye, ive kivala, lwa mwami wowo a veye mwana, navanene vovo va litsanga mugamba

¹⁷ U veye nobugasu, O kivala, mwami wowo lwa ya li mwana wavandu velidzominywa, navanene vovo va lia inyinga i dukanga, va duke kunyola tsingulu, lilia li ta li lyobuhambiki

¹⁸ Kigira bugata yibu kirama kyenyumba kyinami; kandi kigira ubugata bwamakono inyumba i sambuki.

¹⁹ Lisavo li kolangwa kigira lisangala, na iwaini i sangalidzanga livamwoyo; nefetha i letanga litivula lyevindu vyosi.

²⁰ U ta laama mwami, auwa, kali mu tsigana gani tsitsyo; kandi u ta nyega avatugi mu inyumba yoyo: kigira linyonyi lyombwerefu li la hila mwoyo gugwo, na kyetsimbaha ki li vola makuva.