Jeremia 43 - KITABU KITAKATIFU

¹ Na ga duka, lwa Jeremia ya mala kuvolera avandu yavo vosi makuva gosi ga Yahova Nyasaye wavo, aga Yahova Nyasaye wavo ya mu tuma kuvavolera, nago ga veye amakuva yaga gosi,

² hene yaho Azaria mwana wa Hoshaia, na Johanan mwana wa Karea, navandu vosi avoluyai, va vola, ni va volera Jeremia, Ive u volanga bubehi: Yahova Nyasaye wetu si a ku tumi kuvola, Mwinye mu ta tsia Egepeti kumenya yo;

³ navutswa ni Baruku mwana wa Neria u ku goonyanga ku kwinye, a duke kukuvika mu makono ga Vakalidei, va duke kukwiita, nokukuhila avahambe kuduka Babuloni.

⁴ Kunangwa Johanan mwana wa Karea, navanyampara vosi, navandu vosi, si va hulira mwoyo gwa Yahova mba, kumenya mu kivala kya Yuda.

⁵ Navutswa Johanan mwana wa Karea, navanyampara vosi, va vugula avatigala va Yuda vosi, yava avirana kutwula mu tsihiri tsyosi tsya va kungwa kuhilwa mu, va menye mu kivala kya Yuda;

⁶ avasatsa, navakali, navana, navakana vomwami, nomundu sa mulala wa Nebuzaradan munyampara wavalindi ya leka mmukono gwa Gedalia mwana wa Ahikam, mwana wa Shafan; na Jeremia muprofeti, na Baruku mwana wa Neria.

⁷ Na vingira mu kivala kya Egepeti; kigira si va hulira mwoyo gwa Yahova: navo va duka Tahapenesi.

⁸ Nonoho likuva lya Yahova lya duka ku Jeremia ha Tahapenesi, kuvola,

⁹ Vugula magina manene mmukono gugwo, na u ga vise mbudohi mu lyombaka lyamatafali, bu veye ha bwingiriru bwenyumba ya Farao mu Tahapenesi, imbiri wetsimoni tsyavandu va Yuda;

¹⁰ na u va volere Yahova wa mahe, Nyasaye wa Israeii, a vola ndi: Henza, nda tuma nokuvugula Nebukadirezaru mwami wa Babuloni, mutumekiri wange, na nda vika intebe yeye yobwami ku magina yaga aga nda visa; na a la singeridza lihema lilye lyobwami igulu wago.

¹¹ Naye a ladza, nokwingira nokukuya kivala kya Egepeti; yavo avang'olerwa likudza va liitwa; na yavo avang'olerwa buhambe va la va avahambe, na vang'olerwa kivavi va la va ku kivavi.

¹² Na nda fwana muliru mu tsinyumba tsyavanyasaye va Egepeti; naye a la va samba nomuliru, nokuvahila avahambe: na mwene a livika kivala kya Egepeti, kuli mwayi yivikanga tsingubo tsitsye; na a la twula yo nemirembe.

¹³ Kandi a la tigula minara gya Bethshemeshi, gyi veye mu kivala kya Egepeti, netsinyumba tsya vanyasaye va Egepeti a la tsi samba nomuliru.