Jeremia 27 - KITABU KITAKATIFU

¹ Mu litanga lyelyameha lya Jehoiakim mwana wa Josia, mwami wa Yuda, likuva yili lya duka ku Jeremia kutwula ku Yahova, kuvola,

² Yahova a mbolera ndi: Welombere vibohero nenira, wivike migoti lilyo;

³ u vi hile ku mwami wa Edom, noku mwami wa Moabu, noku mwami wa avana va Amon, noku mwami wa Turo, noku mwami wa Sidon, na makono gavatumwa ava duka Yerusalemi ku Zedekia mwami wa Yuda:

⁴ kandi u va lage va tsie ku vanene vavo, va vole, Yahova wa mahe, Nyasaye wa Israeli, a vola ndi, Mu volere avanene venyu likuva yili:

⁵ Inze nda lomba lirova, navandu netsinyama tsi veye mmoni mwelirova, netsingulu tsyange tsinene nomukono gwange gwa nyirwa; na nda ha yavo ava nda lola bulahi kuvaha.

⁶ Na kalunu vivala yivi vyosi mmali kuvivika mmukono gwa Nebukadinezaru mwami wa Babuloni, mutumekiri wange; netsinyama tsyomwigendenyama, mmali kuha uyu tsi mu tumekire.

⁷ Na tsihiri tsyosi tsi la tumekira uyu, nomwana wewe, nomwisukulu wewe kuduka ku madiku gekivala kikye ga duka: hene yaho tsihiri tsinyingi navami vanene va la mu tuga a va tumekire.

⁸ Na ga la duka, ihiri yeyo nobwami yibwo bu sula kutumekira mwami Nebukadinezaru wa Babuloni, yavo ava sula kuvika magoti gavo isi wenira yomwami Nebukadinezaru, ihiri yiyi, Yahova a vola, nda gi ha mageli, nekivavi, nenzala, nobulwaye, kuduka lwa mmala kuvadividza nomukono gwigwe.

⁹ Navutswa ku makuva genyu, mu ta hulira avaprofeti venyu mba, kinga avasegetiri venyu, kinga amaloto genyu, kinga ava ng'oleranga ku malesi, kinga avakumu venyu, ava voleranga mwinye, kuvola, Mwinye si mu la tumekira mwami wa Babuloni mba:

¹⁰ kigira va mu profeteranga ububehi, va duke kumutwulidza mu tsie ihale nekivala kyenyu, kandi inze mmu twulidze, mu dive.

¹¹ Navutswa ihiri i la vika ligoti lyavo isi wenira yomwami wa Babuloni, nokumutumekira, nda leka ihiri yiyi i menya mu kivala kyavo avene, Yahova a vola; navo va la ki lima, nokumenya mukyo.

¹² Nda volera Zedekia mwami wa Yuda kuli makuva yaga gosi, ni mbola, Mu vike amagoti genyu isi wenira yomwami wa Babuloni, mu mu tumekire uyu navandu veve, mu ve mwoyo.

¹³ Mu tsitsa mu likudza kigira ki, ive navandu vovo, ku kivavi, nenzala, nobulwaye, kuli Yahova ya vola ku makuva gehiri i la vula kutumekira mwami wa Babuloni?

¹⁴ Mu vule kuhulira makuva gavaprofeti va mu volera, kuvola, Si mu la tumekira mwami wa Babuloni; kigira va mu profeteranga ububehi.

¹⁵ Kigira inze si nda va tuma mba, Yahova a vola, navutswa va profeta ububehi ku lieta lyange; nduke kutwulidza mwinye, na mu dive, mwinye, navaprofeti ava mu profetera.

¹⁶ Kandi nda volera avasalisi navandu yavo vosi, kuvola, Yahova a vola: Mu ta hulira makuva gavaprofeti venyu va mu profeteranga, kuvola, Henze, viju vyenyumba ya Yahova vi la letwa kalunu ndi vi twule Babuloni kandi; kigira va mu profetanga bubehi.

¹⁷ Mu ta va hulira mba; mu tumekire mwami wa Babuloni, mu ve mwoyo: lidala yili li kolwe hatswa kigira ki?

¹⁸ Navutswa ni i va va veye vaprofeti, kandi ni i va likuva lya Yahova li veye halala navo, va saale Yahova wa mahe kalunu, viju zana vi tigala mu inyumba ya Yahova, ni vi veye mu inyumba yomwami wa Yuda, nomu Yerusalemi, vi vule kutsia Babuloni.

¹⁹ Kigira Yahova wa mahe a vola ku makuva getsitiru, noku makuva genyanza, noku makuva gobwikaliru, noku makuva gelitigala lyeviju vi lekwa mu lidala yili,

²⁰ vya Nebukadinezaru mwami wa Babuloni va vula kuhila, lwa ya hila Jekonia mwana wa Jehoiakim, mwami wa Yuda, mbuhambe, kutwula Yerusalemi kutsia Babuloni, navandu avanene vosi ava Yuda na va Yerusalemi;

²¹ yee, Yahova wa mahe, Nyasaye wa Israeli, a vola ndi, ku makuva geviju vi tigala mu inyumba ya Yahova, nomu inyumba yomwami wa Yuda, nomu Yerusalemi:

²² Viju yivyo vi la hilwa Babuloni, navyo vi la va yo, kuduka ku lidiku lya ndi va luuta, Yahova a vola; hene yaho nda vi leta kandi, nokuvirannya hano.