Isaya 18 - KITABU KITAKATIFU

¹ Ai, kivala kyelihungudza tsi mbaha, ki veye hale kuvita migera gya Ethiopia;

² kivala ki hilanga avatumwa uomuami ku inzira yenyanza, mu amato gelihunzu ku madzi manene, ni va uola, Mu tsie, mwinye avatumwa avetsimbiru, ku ihiri i veye intambi na interere, ku avandu ava li nelitihidza kutwula mu litanga lyavo kuduka kalunu, ihiri i geranga nekigero nokuduvaga hasi, yekivala kyayo kya gavanywa nemigera

³ Mwinye vosi avamenyi mu lirova, na mwinye avamenyi ku kivala lwa ibendera i sungwa igulu ku viguiu, mu lole; na lwa kisiliva ki kupwa, mu hulire.

⁴ Kigira Yahova ya mbolera likuva yili, Nda kiring'ana, na nda lola mu hokumenya hange, kuli masalira mu mbasu, kuli lilesi lyelime inyinga yeligesa.

⁵ Kigira imbiri weligesa li kikiri kuva ho, vimuli ni vi mali kuvunguluka, nevimuli ni vi gwiye mazabibu genga, a la kalaga visivu netsinkonono, na tsisya tsya tavalala a la tsi halula.

⁶ Va la lekwa vosi halala ku amanyonyi malulu gomu vigulu, na tsinyama tsyelirova; na manyonyi malulu ga la lia kuvo inyinga yeki meyu, netsinyama tsyosi tsyelirova tsi la lia kuvo inyinga yobukindu.

⁷ Inyinga yeyo Yahova wa mahe a la leterwa kihaanwa kyavandu avatambi navaterere, navokutihidza kutwula mu litanga lyavo kuduka kalunu, va veye ihiri i geranga nekigero, noku duvaga hasi, yekivala kyayo kya gavanywa nemigera, kuduka ha bu gono bwelieta lya Yahova wa mahe, kigulu kya Zioni.