Esther 6 - KITABU KITAKATIFU

¹ Mu budiku yibwo mwami si ya nyola tsindolo; na ya laga kitabu kya mang'oda ga makuva getsinyinga ki letwe, nago ga somwa imbiri womwami.

² Na ga nyolwa mang'oda, kuli Mordekai ya vola aga Bigithana na Tereshi, vaviri ku va lindi vomwami, ku yava ava linda muliango, ava geridza kuhila makono ku mwami Ahasueru.

³ Na mwami ya teva, Lidzominywa ki na ubunene ki bwa kolerwa Mordekai mu inkuva yiyi? Ma avatumekiri vomwami ava mu tumekira, va vola, Si ya kolerwa kindu kali kilala.

⁴ Na mwami ya teva, Ibwaha u veye mmugidzi? Na Haman ya li ni yingiye mmugidzi gwekyova gwenyumba yomwami, a volerane nomwami, Mordekai a sungwe ku musala gwa ya mu lombera.

⁵ Na avatumekiri vomwami va mu volera, Henza, Haman u singiye mmugidzi. Na mwami ya vola, Yingire.

⁶ Kunangwa Haman yi ngira. Na mwami ya mu teva, A kolerwe inkuva ki mundu womwami a yanza kumwidzominya? Na Haman ya vola mmwoyo gwigwe, Ni bwaha womwami a yanza kwidzominya, na a ta li inze mwene?

⁷ Na Haman ya volera mwami, Mundu uyu womwami a yanza kwidzominya,

⁸ tsi letwe tsingubo tsyobwami tsyomwami yevikanga, na iparasi yomwami a nina ku i vikwe ku mutwe itaji yobwami:

⁹ na ingubo na iparasi vi vikwe mmukono gwomulala ku vanene vomwami u vita avandi vomwami, mundu womwami a yanza kwidzominya, a vikwe natsyo, na va mu kole a nine ku iparasi, na va mu gendidze ku inzira yelidala, na va gambe imbiri wewe, Ni ndiyo mundu womwami a yanza kwidzominya, a kolerwe.

¹⁰ Kunangwa mwami ya volera Haman, Kola bwangu, u vugule tsingubo na iparasi, kuli u voye, na u kolere ndiyo Mordekai Muyuda, wikaye mu kiribwa kyomwami: na kindu kilala ki ta gehera ku gosi aga u voye.

¹¹ Kunangwa Haman ya vugula tsingubo na iparasi, na a vika Mordekai, na a mu kola, a nine ku iparasi, nokugenda ku inzira yeli dala, nokugamba imbiri wewe, Ga la kolwa ndiyo ku mundu womwami a yanza kwidzominya.

¹² Na Morde kai yirana ku kiribwa kyomwami. Navutswa Haman ya bia yengo wewe bwangu nokuvererera, na a kunika mutwe gwigwe.

¹³ Na Haman ya volera Zereshu mukali wewe na valina veve vosi gosi aga mu gwira. Ma ava geeri veve, na Zereshu mukali wewe va mu volera, Mordekai na a va na veye Muyuda, wa u tangi kugwa imbiri wewe, si u li nyala kumuguuta, navutswa ligali u la gwa imbiri wewe.

¹⁴ Na lwa va volerana naye, avalindi vomwami vadza, ni va kola bwangu kumuhila ku lilia lya Esther ya lomba.