Ayubu 5 - KITABU KITAKATIFU

¹ Wanire kalunu; a veye ho mulala a la ku tivulira? N a u la yeka ku u li na mu vatakatifu?

² Kigira ubutima bwitanga mundu musiru, Na imbodoka yiitanga umusiru.

³ Ndoli avasiru va hilanga imiri hasi: Navutswa nonoho nda laama ubumenyo bwibwe.

⁴ Avana veve va veye ihale nobu honywi, Va mineywi ku kiribwa, Na si ha veye noyu u nyala kuvahonnya:

⁵ Weligesa lilye li libwa navenzala, Nokulivugula kali mu mafwa; Nomutego gu kunulanga munw gu vugule ubutugi bwavo.

⁶ Kigira kivi si ki twulanga mu lugukyi, Kandi lidambidzwa si li meranga mu lirova;

⁷ Navutswa mundu yivulangwa kupe kivi, Kuli tsisese tsyomuliru tsi du manga igulu.

⁸ Navutswa nkano nda kenya Nyasaye Nokuvika ku Nyasaye likuva lyange;

⁹ Uyu u kolanga vindu vinene vi ta manyekana, Vindu vyokugenya vi ta valika:

¹⁰ Uyu u letanga imbula ku lurova, Nokuhila amadzi mmilimi;

¹¹ Kuduka uyu a ginganga ava veye hasi, Na va syomanga va gingangwa va duke ku mirembe.

¹² Uyu yononnyanga amakuva gava gadi, Kuduka makono gavo si ga nyala kudukidza lisaavira lyavo.

¹³ Uyu a gumiranga avageeri mu bugeeri bwavo; Na livola lyavakyamu li divanga bwangu.

¹⁴ Va vugananga nekisundi inyinga yombasu Va havatidzanga mmbasu kuli mu budiku.

¹⁵ Navutswa uyu a honyanga va twule ku kivavi kyeminwa gyavo, Kali kuhonnya mudambi ku mu kono gwowetsingulu.

¹⁶ Kunangwa mudaka a veye nelisuuviridzwa Na ubudamano bu hana munwa gwabwo.

¹⁷ Henza, a veye nobugasu mwldu wa Nyasaye a hedzanga mageli: Kigira yaga u ta lega amageli go Wanyala Vyosi.

¹⁸ Kigira uyu a saliridzanga, kandi a bohereranga; Yatanga ulugoma nomukono gwi gwe gu honnyanga.

¹⁹ A la honnya ive ku vivi vitano na kilala; Yee, kali mu vitano na viviri si ha veye nobudamano kali bulala bunyala kudira ive.

²⁰ Inyinga y enzala a la ku tungira u twule ku likudza; Noku bulwani a la ku tungira u twule ku tsingulu tsyekivavi.

²¹ U la viswa kutwula ku lukova lwolulimi Kandi u la vula kutia lidividza lwa li duka ku ive.

²² Ive u la seka ku lidividza nenzala; Kandi si u la tia tsinyama tsindulu tsyelirova.

²³ Kigira u la va nelihambana namagina gekivala; Netsinyama tsyombulimu tsi la va nemirembe ku ive.

²⁴ U la manya lihema lilyo li veye mu mirembe; Na u la liguula kego kikyo na u la lola si ha veye nekindu kya geha.

²⁵ Kandi u la manya kisukululwi kikyo ki la va kinene, Na vivuli vove vi la va kuli bu nyasi bwelirova.

²⁶ U la duka mu kilindwa kikyo wemihiga midukiru Kuli kiganda kyengano ki vedza nga mu tsinyinga tsyakyo.

²⁷ Henza aga kwideye yaga, ga veye ndiyo ligali, U ga hulire, u ga manye u nyole ubulahi.