Ayubu 22 - KITABU KITAKATIFU

¹ Hene yaho Elifazu Muteman ya tivula, na a vola,

² Mundu ku vosi a nyala ku konya Nyasaye? Ligali wobugeeri yekonyanga mwene.

³ Wanyala Vyosi a nyolanga ubuyanzi, mu ive kuva mulungi? Kinga ki veye kyambeti kuye, ive nu u va u kola tsinzira tsitsyo tsindukiru?

⁴ Ga veye kigira ive wa mu tia, uyu a ku gondokera, Nokwingira mu likalaga halala nive?

⁵ Ubudamano bubwo si bu veye bunene? Kandi vidamano vivyo si vi veye nekiheri.

⁶ Kigira u vuguye kihambiriru ku amwavo wowo vutswa, Nokunavula tsingubo tsya va veye kyahonyo.

⁷ Si u heye uyu u luhi amadzi gokunwa mba Kandi wimi wenzala vyokulia.

⁸ Navutswa ku makuva gomuluviriri, ya li nelirova Nomundu woluyali, uyu ya menyamulyo.

⁹ Ive u kungi avakunzakali makono mayaka, Na makono gavabisandu ga vunanyeywi.

¹⁰ Kigira yaga ive u kumbiridzeywi nemitego, No ubutii bwa nonoho bu ku dambidzanga,

¹¹ Kinga kisundi, u vule kulola Na amadzi manyingi ga ku kunika.

¹² Nyasaye si a veye migulu? Kandi henza, ubutambi bwetsing'ering'ani kuli tsi veye igulu

¹³ Na ive u vola, Nyasaye a manya ki? A nyala kukalaga hagati hekisundi kinene?

¹⁴ Malesi maliduhu ga gwiye kikuniko kikye, u vule kulola: Na a gendanga ku bwikudumbu bweligulu.

¹⁵ U la londa inzira ya kale Ya vandu vadamano va sena ku?

¹⁶ Avedzumbwa inyinga yavo ni kikiri kuduka, Avomuse gwavo gwa sundulwa kuli mugera,

¹⁷ Ava volera Nyasaye, Twula u ku leke; Na, Wanyala Vyosi a nyala kukukolera ki?

¹⁸ Halala na yaga yizulitsa tsinyumba tsyavo vindu vilahi; Navutswa makuva gavadamano ga veye ihale ninze.

¹⁹ Avalungi va ga lola, na va sangala; Na va ta veye nelihyolo va va sekanga,

²⁰ Ni va vola, Ligali yavo ava ku vukira va kalageywi kutwulidzwa, Na va tigala kuvo va sambeywi nomuliru.

²¹ U mu mannye ligali kalunu, u ve nemirembe: Na ndiyo ubulahi bu la ku dukira.

²² Mwadza, u bugirire lilaga li twulanga mmunwa gwigwe, Na u vike makuva gege mmwoyo gugwo.

²³ Nu u va ni wirana ku uyu Wanyala Vyosi, u lombakwa, Nu u va nu u twulidza ubukyamu bu ve ihale ku lihema lilyo,

²⁴ Na akiba yoyo u gi vike mu lugukyi, Nethahabu ya Ofiru u gi vike hagati ha magina gemigera

²⁵ Na uyu Wanyala Vyosi a la vaakiba yoyo, A la va ifetha yobuguli budinyu ku ive.

²⁶ Kigira hene yaho u leyanzidza mu Wanyala Vyosi, Nokuginga mmoni mumwo kuyeka ku Nyasaye.

²⁷ U la saala naye a la hulira lisaala lilyo; Na u la tunga malagano gogo.

²⁸ Kandi u la lomba likuva, nalyo li la dinyeridzwa ku ive; Na ubulavu bu la ng'ering'ana kutsinzira tsitsyo.

²⁹ Lwa va ku tsoma hasi, u la vola Lisingeridzwa li veye ho kandi, Na mwegehidzi a la mu honnya.

³⁰ A la honya uyu u veye munifu: Yee, u la honnywa kigira ubunifu bwamakono gogo.