Ayubu 18 - KITABU KITAKATIFU

¹ Hene yaho Bildadi Mushuhi ya tivula, na a vola,

² Mwenyera amakuva kuduka inyinga ki? Mu ganagane, na nyima ku la vola.

³ Kigira ki ku volangwa kuva kuli tsinyama, Kandi ku gwiye avadamano imbiri wowo?

⁴ Ive wetandulanga mwene, mbutima bubwo, Lirova li la lekwa kigira ive? Kinga lwanda lu la twulidzwa mbugono bwalwo?

⁵ Yee, ubulavu bwavadamano bu la siminywa Na isese yomuliru gwigwe i la vula kung'ereng'ana.

⁶ Ubulavu mu lihema lilye bu la va kisundi, Na itaya i veye igulu wewe i la siminywa.

⁷ Tsinduvatiru tsyetsingulu tsitsye tsi la vikwa mu kivi, Na makuva gege mwene ga la mu tsoma hasi.

⁸ Kigira virenge vivye mwene vi mu teye mu mutego, Na a gendanga ku mitego gy viseywi.

⁹ Mutego gu la mu gumira liki lilye Na mbeto gu la mu hamba.

¹⁰ Kivetobki viseywi mmarova, Nomtego mu inzira.

¹¹ Vindu vyokutihidza vi la mbika mu butii tsimbega tsyosi, Nokumulonderera tsimbiru himbi na maki gege.

¹² Tsingulu tsitsye inzala i la tsi luma, Na kivi ki la va ni kyetegeki ha mbalu hehe.

¹³ Ki la lia vivero vyomubiri gwigwe, Yee, wa tanga kwivulwa welikudza a la lia vivero vivye.

¹⁴ A lifwa mu lihema lilye lya ya suuviranga mu; Na a la letwa ku mwami welitihidza.

¹⁵ Yikyo ki ta veye kikye ki la menya mu lihema lilye: Kibiridi ki la tsukwa ku bumenyo bwibwe.

¹⁶ Imiri gyigye gyi lumira musi, Na luvega lwa igulu lusya lwilwe lu la temagwa.

¹⁷ Lidzulitswa lilye li la diva kutwula ku lirova, Na si a la va nelieta ku lihasi.

¹⁸ A la kungwa kutwula mbulavu a tsie mkisundi Nokukungwa a twule mu lirova.

¹⁹ Si a la va nomwana muyai, kinga nomwisukulu mu avandu veve Kinga mundu u tigala kali mulala ha ya menya.

²⁰ Yava ava lidza inyima wewe va la genyira lidiku lilye, Kuli yavo avembiri va tihidzwa.

²¹ Ligali li veye ndiyo limenya lya va ta li avalungi, Na hano na hango ha uyu wa vula kumanya Nyasaye.