3 Yohana 1 - KITABU KITAKATIFU

¹ Mukulundu, ibaruwa yeye yiyi i dukire Gayo muyanze wa nyanza mu ageligali.

² Muyanze, nsaala ive u konywe mu vindu vyosi kandi u ve mulamu, kuli ive mwene u konywi mu mwoyo gugwo.

³ Kigira nda yanza ligali lwa vamitu va duka nokulolekidza ageligali gogo, kuli ive u gendanga mu ageligali.

⁴ Si mbeye nobuyanzi bu vita yibu kuhulira amakuva ga vana vange va gendanga mu ageligali.

⁵ Muyanze, ive u kola miyinzi gyobusuuvirifu mu miyinzi gyosi gya u koleranga avamitu navageni;

⁶ ava lolekidza ubuyanzi bubwo imbiri welivugana: ava u la kola bulahi inyinga u va konya ku lugendo lwavo kuli vi dukananga ku Nyasaye:

⁷ kigira va twula kigira Lieta lilye, va vuli kuvugula kindu ku Tsihiri.

⁸ Kigira yaga kwinye ga ku dukira kubugi rira ava veye kuli yava, ku duke kuva avasangi mu miyinzi ku ageligali.

⁹ Nda ng'oda makekeke ku livugana: navutswa Dioterefe, u yanza kuva imbiri kuvo, si a ku bugirira mba.

¹⁰ Kigira yaga ni mba ni nduka, ndidzulitsa miyinzi gyigye gya a kolanga, u vola ku kwinye ga vutswa mu makuva madamano: kandi yaga si ga mu duka, navutswa mwene si a bugirira avamitu, kandi avenyanga kuvabugirira a va ga yanga nokuvakunga mu livugana.

¹¹ Muyanze, u tefwanannya ku ki veye kidamano, navutswa wefwana nnye ku ki veye kilahi. U kolanga bulahi a twula ku Nyasaye: u kola nga ubudamano si ya lola Nyasaye.

¹² Demeterio, vosi va mu lolekidza kandi ageligali ga mu lolekidza: yee, kandi kwinye ku mu lolekidza kandi ive u manya lilolekidza lyetu ii veye lyeligali.

¹³ Nda li namakuva manyingi gokung'odera ive, navutswa si nyanza kukung'odera nobwino nekalamu;

¹⁴ navutswa nsuuvira kukulola bwangu, kandi ku la volerana moni na moni.

¹⁵ Mirembe gyi ve ku ive. Avalina va ku chelidza. U chelidze valina sa mulala nelieta lilye.