2 Vatesalonike 2 - KITABU KITAKATIFU

¹ Kalunu ku goonya mwinye, avamitu, ku makuva gelidza lyo Mwami wetu Yesu Kristo, noku livugannywa lyetu kuye;

² mu duke kuvula kusundwa bwangu mu tsiganagani tsyenyu, kinga mu ta hendidzwa mu myoyo gyenyu ku roho, kinga ku likuva, kinga ku ibaruwa i fwana yetu, kuli lidiku lyo Mwami li veye hano.

³ Mundu kali mulala a ta mu gada ku vindu vyosi: kigira lidiku yilyo si li ladza ubwibaali ni bu kikiri kuduka, kandi mundu wobwoni u li lang'aminywa, mwana wobudivi,

⁴ u kolanga ubuhing'ani nokwiidzominya mwene ligali ku vyosi vi langwa Nyasaye, noku vyosi vi sigamirangwa, kuduka kwikala hatakatifu ha Nyasaye, nokwelang'aminya mwene a ve Nyasaye.

⁵ Si mwidzulira lwa nda li nemwinye, nda mu volera vindu yivyo?

⁶ Kandi kalunu mu manya yikyo kigaliranga a duke kulang'aminywa ku inyinga yeye.

⁷ Kigira aga viswa gobudialu kalunu ga veye mu miyinzi: navutswa a veye yo mulala wigaliranga kalunu, kuduka lwa a li twulidzwa.

⁸ Hene yaho mudialu a la lang'aminywa, wo Mwami Yesu a liita nomwika gwonunwa gwigwe, nokumudividza neliang'aminywa lyelidza lilye;

⁹ mulialu uyu welidza lilye li veye kuli ikola lya Setani mu tsingulu tsyosi, nevilolekidzu nevyokugennya vyobubehi,

¹⁰ nobugadi bwosi bwobudamano ku yava ava divanga; kigira si va vugula ubuyanzi bwageligali, va duke kuhonnywa.

¹¹ Kandi kigira yaga Nyasaye a va letera ubugadi bwetsingulu, va duke kusuuvira ububehi:

¹² vosi va duke kukalagirwa amakuva gavo ava vula kusuuvira ageligali, navutswa va hongera kuyanza ubudamano.

¹³ Navutswa ga dukira kwinye kusantidza Nyasaye kazozo kigira mwinye, avamitu avo Mwami a yanza, kigira Nyasaye ya tovola mwinye kutwula invinga yelitanga, mu nyole ubuhonnyi mu litakaswa lya Roho nomu lisuuvira ageligali:

¹⁴ lya mu langirwa mu ivangeli yetu kuduka kunyola ubukumi bwo Mwami wetu Yesu Kristo.

¹⁵ Kunangwa, avamitu, singiri nobuluviriri mu gumire megidzo ga mwegidzwa, niva ku makuva getu kinga ku ibaruwa vetu.

¹⁶ Kalunu Mwami wetu Yesu Kristo mwene, na Nyasaye Dada wetu wa ku yanza na a ku ha kilema mwoyo kyemihiga nemihiga nelisuuvira lilahi mu tsimbabasi,

¹⁷ a leminye myoyo gyenyu nokugyiluviriridza mu miyinzi gyosi milahi nomu makuva gosi.