2 Petro 2 - KITABU KITAKATIFU

¹ Navutswa kandi va singira avaprofeti avobubehi va twula mu vandu, kuli ndiyo va la va ho mu mwinye avegidzi vobubehi, ava li leta kalaha lyekala vidieli vyobugotidzi ni vambakana Mwami wa va gula nokweletera avene ubudivi bwa bwangu.

² Kandi vanyingi va la londa likola lyavo lyekifwabwi; kigira yava inzira yageligali i la nyegwa.

³ Kandi mu likayirwa lyavo va lenyolera madanyi ku mwinye ku makuva gobugadi: avelikalagirwa lyavo kutwula kale si li lindagira, kandi ubwoneku bwavo si bu gona tsindolo.

⁴ Kigira Nyasaye na a va ni ya vula kuvererera tsingelosi lwa vona, navutswa ya va ta mu gehena, nokuvavika mu bogo bwekisundi, va lindwe kuduke likalagirwa;

⁵ kandi ni ya vula kuvererera avelirova va kale, navutswa ya honnya Nuhu, mwilwadzi wobulungi, navandi vatano na vaviri, inyinga ya leta amadzi manene ku lirova lya vula kutia Nyasaye.

⁶ Na ya girunkannya madala ga Sodoma na Gomora ga gwe ligoke, ya ga kalagira ubudivi bwelitung'aminywa, na a ga kola kilolekidzu kuvo va li menya nelivula kutia Nyasaye;

⁷ kandi ya honnya Loti wobulungi, wa vereridzwa ligali ku limenya lyekifwabwi lyavebaali

⁸ (kigira mundu uyu mulungi lwa ya menya muvo, mu lilola nomu lihulira, ya vereridza mwoyo gwigwe mulungi madiku namadiku ku likola lyavo lyobwebaali).

⁹ Mwami a manya inzira yokuvahonnya mu ligeridzwa ava mu tia, nokuvika avadamano mu kivi kuduka ku lidiku lyelikalaga;

¹⁰ navutswa kuvita ni yavo ava londanga mu mubiri mu likayirwa lyekifwabwi, nokulega ubwamehi. Avobuluviriri mu budamano, avahingi, ava vula kudegera ku livola amanyego ku ga kuminyangwa:

¹¹ navutswa yaga gosi, kali tsingelosi ni va veye avanene kuvita mu tsingulu nomu linyala, si va letanga kiyalo kyamakuva madamano kuvo imbiri wo Mwami.

¹² Navutswa yava, kuli vilombe vi ta li nobugeeri, vivulwa tsinyama vutswa kugumirwa nokugotidzwa, ava nyeganga mu vindu vya va vula kumanya, mu lyononnya lyavo va lononywa ligali,

¹³ ubudamano bu va gwira kuli amadanyi gelikola ubudamano, ava lolanga nu bulahi kulonda ubuhuvali mu mbasu, ubudondonye netsimbala, va londa ubuhuvali mu bugadi bwavo, inyinga va veye mu lilia halala nemwinye;

¹⁴ ava veye netsimoni tsyobuheyi ava ta nyala kwigaya ku bwoni; ava goonyanga myoyo gyiyagika; ava veye nomwoyo gwa nalidzwa mu likayirwa; avana vekikyeno;

¹⁵ ava leka inzira indahi, ni va gota lwa va londa inzira ya Balaam wa Beoru wa yanza madanyi gelikola ubudamano;

¹⁶ navutswa ya gaywa ku lihyolo lilye: isukiri i ta veye nomwoyo ya vola amakuva gomundu nokwigalira ubulalu bwomuprofeti uyo.

¹⁷ Yava nivo vidabo vi ta li namadzi, nelilumbe lyekihuudzudzi ki hilanga, ava vikeywi ubumwamu bwekisundi.

¹⁸ Kigira mu livola amakuva ga vimba ligali ga vutswa va goonya mu likayirwa lyomubiri nekifwabwi, yavo ava tanganga kwiruka kutwula ku yavo ava menya mu bugadi;

¹⁹ va ta suuviridza libohololwa, inyinga avene va veye avatugwa vobwoneku; kigira mundu na a guuti wundi u guuteywi a manyanga a gwa mutugwa wa uyu wa mu guuta.

²⁰ Kigira niva inyima yokutwula mu vindu vyekifwabwi kyelirova ku limanya Mwami Muhonnyi Yesu Kristo, ni virana kuhambwa kandi nokuguutwa mukyo, liva lyavo lyenyima li gwiye lidamano kuvita lyembiri.

²¹ Kigira nkano nu bulahi kuvo va la vula kumanya inzira yobulungi, kuvita limanya nokwirana nokuleka megidzo matakatifu ga va hebwa.

²² Ga gwiye kuvo kuli lugano lweligali, Imbwa kwirana kandi ku maluki gayo, nempidzi i singeywi kugalagala mu budohi.