2 Kyetsinyinga 21 - KITABU KITAKATIFU

¹ Na Jehoshafatu ya gona halala navaguga veve, na ya tebwa halala navaguga veve mu lidala lya Daudi: na Jehoram mwana wewe yameha mbugono bwibwe.

² Naye ya li navamwavo veve, avana va Jehoshafatu: Azaria, na Jehieli, na Zekaria, na Azariahu, na Mikaeli, na Shefatia; yava vosi va li avana va Jehoshafatu mwami wa Israeli.

³ Na dada wavo ya va ha vihaanwa vinene, vyefetha, nethahabu, nevindu vyobuguli budinyu, halala namadala getsingaga mu Yuda: navutswa ya ha Jehoram ubwami, kigira niye wa tanga kwivulwa.

⁴ Ma Jehoram lwa ya mala kusingira ku bwami bwa dada wewe, nokwivika tsingulu, yiita vamwavo veve vosi nekivavi, na valala kandi ku vanene va Israeli.

⁵ Jehoram ya li wemihiga makumi gavaka na gyiviri lwa ya tanga kwameha; na yameha mihiga gyitano negyivaka mu Yerusalemi.

⁶ Na ya genda ku inzira yavami va Israeli, kuli inyumba ya Ahabu ya kola; kigira ya kwa mukana wa Ahabu: na ya kola budamano mu imoni mwa Yahova.

⁷ Kali halala na yaga Yahova si yenya kudividza inyumba ya Daudi, kigira lilagana lya ya lomba na Daudi, na kuli ya mu suuviridza kumuha itaya, uyu, na vana veve mihiga nemihiga.

⁸ Mu madiku gege Edom vebaala kutwula isi wa mukono gwa Yuda, vevikira mwami avene.

⁹ Hene yaho Jehoram yambuka halala navanyampara veve, na magari gege gosi halala naye: ya vuka ubudiku, na ya kuya Vaedom ava mu kumbi ridza, uyu na vanyampara vamagari.

¹⁰ Ni ndiyo Edom vebaala isi womu kono gwa Yuda kuduka lero: hene yaho Libina yebaala inyinga yeyo, kutwula isi womukono gwigwe, kigira ya leka Yahova, Nyasaye wavaguga veve.

¹¹ Kuvita yaga ya lomba hadigu luku mu vigulu vya Buyuda, na ya vika netsingulu ava menya Yerusalemi mu buheyi, na a kyaminya Vayuda.

¹² Ibaruwa ya duka kuye kutwula ku muprofeti Elija, ya vola, Yahova, Nyasaye wa dada wowo Daudi a vola, Kigira ive wa vula kugenda ku tsinzira tsya dada wowo Jehoshafatu, kinga ku tsinzira tsya Asa mwami wa Yuda,

¹³ navutswa u genda ku inzira yavami va Israeli, kandi u vike netsingulu Yuda nava menyi Yerusalemi mu buheyi, kuli inyumba ya Ahabu, kandi wiiti avamwavo vovo avenyumba ya dada wowo, ava li avalahi kuvita ive:

¹⁴ henza, Yahova a la kuya avandu vovo, navana vovo, na vakali vovo, nobutugi bubwo bwosi nepelegi inene;

¹⁵ na ive ubulwaye bu la va ku ive bunene ku bulwaye bwa mala, kuduka gaguluke munda mumwo kigira li lwala lya kazozo.

¹⁶ Yahova ya vukidza myoyo gya Vafilisiti, na gya Vaarabu ava li ku tsimbega tsya Vaethiopia, ku Jeho ram:

¹⁷ na vanegira ku Yuda, ni vononnya, ni va hila ubutugi bwosi ubwa nyoleka mu inyumba yomwami, halala navana veve, na vakali veve, si ya lekerwa mwana, navutswa Jehoahazu, mukogoti ku avana veve.

¹⁸ Na inyima wa yaga gosi Yahova ya mu kuya nobulwaye bwa amala bu ta li nolunyasi.

¹⁹ Na ga duka, lwa inyinga ya vita, ku kiheri kyemihiga gyiviri, amala gege gaguluka kigira ubulwaye bwibwe, ya kudzira mu lilwala lidamano. Navandu veve si va mu vuyidzira vimuli, kuli vya vaguga veve mba.

²⁰ Ya li wemi higa makumi gavaka na gyiviri lwa ya tanga kwameha, na yameha mu Yerusalemi mihiga gyitano na gyivaka: ya twula bugira kwenywa: na va mu ta mu lidala lya Daudi, navutswa si va mu ta mu vilindwa vyavami.