2 Kyetsinyinga 14 - KITABU KITAKATIFU

¹ Ma Abija ya gona halala nava guga veve, ni va mu ta mu lidala lya Daudi; na Asa mwana wewe yameha mbugono bwibwe. Mu ma diku gege kivala kyehodzeridza mi higa likumi.

² Asa ya kola vindu vilahi vyobulu ngi mu tsimoni tsya Yahova Nyasaye wewe:

³ kigira ya twulidza bwali bugeni, na hadiguluku, na ya sambula vifwananyi, na ya tema misala gyemisambwa,

⁴ na ya laga Yuda kwenya Yahova, Nyasaye wavaguga vavo, nokukola kuli lilaga na malago.

⁵ Kandi ya twuldza mu madala gosi ga Yuda hadiguluku, nevifwananyi vyeliuva: na ubwami bwehodzeridza imbiri wewe.

⁶ Yombaka madala getsingaga mu Yuda; kigira kivala kyehodzeridza, si ya li nobulwani mmihiga yigyo, kigira Yahova va mu sosidza.

⁷ Ya volera Vayuda, Gendi, kwombake madala yaga, nokweva kugo tsingaga tsyamadigi, na vitara dzi, neviribwa, nemiluguyu; kivala ki veye nobwiyangu imbiri wetu, ki gira kwenya Yahova Nyasaye wetu; kwa mwenya, naye ya ku sosidza tsimbega tsyosi. Ma vombaka ni va gasidzwa.

⁸ Na Asa ya li nelihe lya yavo ava ginga tsikuti na matimo, avandu va Yuda tsielfu tsimia tsivaka; narandu va Benjamini, va ginga tsingavo nokugumira ubuta, tsielfu tsimia tsiviri na makumi gatano na gavaka: yava vosi va li avasatsa avetsingulu na valuviriri.

⁹ Zera Muethiopia ya va twulira nelihe lyetsielfu elfu, na magari tsimia tsivaka, na ya duka ha Meresha.

¹⁰ Hene yaho Asa ya tsia kuye, ni va singeridza ubulwani mivona lya Zefatha ha Meresha.

¹¹ Na Asa yanira Yahova Nyasaye wewe, na a vola, Yahova, si ha veye nowundi u nyala kukonya navutswa ive, hagati ha uyu u veye wetsingulu, na uyu u ta li wetsingulu: u ku konye, O Yahova Nyasaye wetu; kigira kwese demi ku ive, kandi ku twuliye kiduma yiki nelieta lilyo. O Yahova, ni ive Nyasaye wetu; mundu a ta guuta ive mba.

¹² Ma Yahova ya kuya Vaethiopia imbiri wa Asa na imbiri wa Yuda; na Vaethiopia viruka.

¹³ Na Asa navandu va li halala naye va va londerera kuduka Gerari: navanyingi ku Vaethiopia va gwa va luha va vula kwehonya; kigira va dividzwa imbiri wa Yahova, na imbiri welihe lilye; na va hila vilanye vinyingi ligali.

¹⁴ Na va kuya madala gosi aga li ku tsimbega tsya Gerari; kigira litihidza lya Yahova lingira kuvo: na va lanya madala gosi; kigira vilanye vinyingi vya li mugo.

¹⁵ Na va kuya kandi ma hema gemitugu, ni va hila amagondi manyingi, netsing'amia, ni virana Yerusalemi.