2 Avami 14 - KITABU KITAKATIFU

¹ Ku muhiga gwa kaviri gwelya meha lya Joashu mwana wa Jehoahazu mwami wa Israeli, Amazia mwana wa Joashu mwami wa Yuda ya tanga kwameha.

² Ya li umu ndu wemihiga makumi gaviri na gyitano lwa ya tanga kwarneha, na yameha mihiga makumi gaviri na gyitano na gyine mu Yerusalemi: nelieta lya mama wewe lya li Jehoadin we Yerusalemi.

³ Ya kola bulungi imbiri wa Yahova, navutswa si bwa leng'ana nobwa guga wewe Daudi mba: ya kola kuli vyosi vya dada wewe Joashu ya kola.

⁴ Navutswa hadiguluku si ha twulidzwa mba: avandu va li ni va ki haananga vihaanwa nokuvuyidza vimuli mu hadi guluku.

⁵ Na ga duka nonoho, lwo bwami bwa dinyeridzwa mmukono gwigwe, yiita vatumekiri veve aviita dada wewe:

⁶ navutswa avana va valumindi yavo si ya viita mba; kuli ga ng'odwa mu kitabu kyelilaga lya Musa, kuli Yahova ya laga, na a vola, Avadada si va liitwa kigira avana, kandi avana si va liitwa kigira vadada; navutswa mundu sa mulala a la kudza kigira ubwoni bwibwe mwene.

⁷ Yiita vandu tselfu likumi va Edom mu Livona lyo Munyu, nokuvugula Sela nobulwani, nokugulika lieta lyalyo Jokitheeli kuduka lero.

⁸ Hene yaho Amazia ya tuma vatumwa ku Jehoashu, mwana wa Jehoahazu mwana wa Jehu, mwami wa Israeli, na a vola, Hamba ku lolane.

⁹ Na Jehoashu mwami wa Israeli ya tuma avatumwa ku Amazia mwami wa Yuda, na a vola, Litagalu lya li mu Lebanon lya tuma mutumwa ku mutaragwa gwa li Lebanon, ni gu vola, U vakire mwana wange mukana wowo: nenyama indulu ya li mu Lebanon ya vita, ni i duvaga litagalu.

¹⁰ Ligali ive wa guuta Edom, nomwoyo gugwo gwa kwigingiridza: wiidzominye ku yago, nokumenya hango hoho; kigira ki wegemeranga u luhe u gwe, ive, na Yuda halala nive?

¹¹ Navutswa Amazia si ya bugirira kuhulira. Ma Jehoashu mwami wa Israeli yanegira; navo va lolana na Amazia mwami wa Yuda, mu Beth shemeshi ya Yuda.

¹² Na Yuda ya guutwa ligali imbiri wa Israeli; na virukira sa mulala mu lihema lilye.

¹³ Na Jehoashu mwami wa Israeli ya gumira Amazia mwami wa Yuda, mwana wa Jehoashu, mwana wa Ahazia ha Bethshemeshi, na a tsia Yerusaiemi, na a sambula lidigi lyo lugaga lwa Yerusalemi kutwula ku kiribwa kya Efiraim kuduka ku kiribwa kyekorna, ligera lyamakono tsimia tsine.

¹⁴ Na ya vugula ithahabu yosi nefetha yosi, neviju vyosi vya nyoleka mu inyumba ya Yahova, nobutugi bwa li mu inyumba yomwami, kandi avekihambavayi, na yirana Samaria.

¹⁵ Na vikolwa vya tigala vya Jehoashu vya ya kola, netsingulu tsitsye, na kuli ya lwana na Amazia mwami wa Yuda, si vya ng'odwa mu kitabu kyetsinyinga tsyavami va Israeli?

¹⁶ Na Jehoashu ya gona halala navaguga veve, na ya tebwa mu Samaria halala navami va Israeli; na Jeroboam mwana wewe yameha mbugono bwibwe.

¹⁷ Na Amazia mwana wa Joashu mwami wa Yuda ya li mwoyo kuduka mihiga likumi na gyitano inyima welikudza lya Jehoashu mwana wa Jehoahazu mwami wa Israeli.

¹⁸ Na vikolwa vya tigala vya Amazia, si vya ng'odwa mu kitabu kyetsinyinga tsyavami va Yuda?

¹⁹ Na va kola bwebaali kuye mu Yerusalemi; naye yirukira Lakishi: navutswa va hila avandu kumulonderera kuduka Lakishi, ni va mwiitira yo.

²⁰ Na va mu letera ku tsiparasi; na a tebwa Yerusalemi halala navaguga veve mu lidala lya Daudi.

²¹ Navandu vosi va Yuda va vugula Azaria, wa li mwana wemihiga likumi na gyitano na mulala, na va mu kola mwami mbugono bwa dada wewe Amazia.

²² Naye yombaka Elathu, nokuligalukidza mu buami bwa Yuda, inyima wa yaga mwami ya gona halala navaguga veve.

²³ Ku muhiga gwelikumi na gyitano gwa Amazia mwana wa Joashu mwami wa Yuda, Jeroboam mwana wa Joashu mwami wa Israeli ya tanga kwameha ha Samaria, na yameha mihiga makumi gane na mulala.

²⁴ Ya kola budamano imbiri wa Yahova: si yavukana nobwoni bwosi bwa Jeroboam mwana wa Nebati, bwa ya gotidzira ku Israeli.

²⁵ Uyu ya galukidza tsinzako tsya Israeli kutwula ho kwingira Hamathu kuduka ku nyanza yekyangalangwi, kuli likuva lya Yahova, Nyasaye wa Israeli, lya ya vola nomunwa gwomutumekiri wewe Yona mwana wa Amitai, muprofeti, wa li mundu wa Gath-heferi.

²⁶ Kigira Yahova ya lola kivi kya Israeli kya li kilulu ligali; kigira si ha li nomundu wa bofwa kinga wa bohololwa, kandi si ha li nomkonyi wa Israeli.

²⁷ Na Yahova si ya vola a leya lieta lya Israeli isi weligulu; navutswa ya va honnya ku mukono gwa Jeroboam mwana wa Joashu.

²⁸ Vikolwa vya Jeroboam vya tigala, nevindu vyosi vya ya kola, netsingulu tsitsye, kuli ya lwana, na kuli ya galukidza Damasko, na Hamathu, mu bwami bwa Israeli, lya li lya Yuda, si vya ng'odwa mu kitabu kyetsinyinga tsyavami va Israeli?

²⁹ Jeroboam ya gona halala navaguga veve, halala navami va Israeli; na Zakaria mwana wewe yameha mbugono bwibwe.