1 Vatesalonike 5 - KITABU KITAKATIFU

¹ Navutswa ku makuva getsinyinga nagemihiga, avamitu, si mu veye nelyenya kung'oderwa likuva.

² Kigira mwinye avene mu manya ligali lidiku lyo Mwami lidzanga kuli mwivi yadzanga ubudiku.

³ Lwa va volanga, Gyi veye mirembe kandi lyelemeridza, hene yaho ubwoneku bu la va nyola bwangu, kuli lilumwa lyelivula li dukiranga u veyenda, navo ligali si va la hona mba.

⁴ Navutswa mwinye, avamitu, si mu veye mu kisundi, lidiku yilyo li mu nyole kuli mwivi:

⁵ kigira mwinye mwosi mu veye avana vobulavu navomu mbasu; kwinye si ku veye avobudiku kinga avekisundi;

⁶ kunangwa ku ta gona kuli avandi, navutswa ku linde ku ve nobugeeri.

⁷ Kigira yavo ava gonanga va gona ubudi ku, navo va hambikanga va hambika ubudiku.

⁸ Navutswa kwinye kigira ku veye avombasu, ku ve nobu geeri bwetu, kwivike isalamba yomu kiritu yelisuuvira neyobuyanzi; negu dwa yekivya yelisuuvira lyobuhonnyi.

⁹ Kigira Nyasaye si ya ku vika ku ve avobutima, navutswa ku nyole ubuhonnyi ku Mwami wetu Yesu Kristo,

¹⁰ wa ku kudzera ni ku va ni ku linda, kinga ni ku va ni ku gona, ku ve mwoyo halala naye.

¹¹ Kunangwa mu tsuvane mwinye avene navene nokwombakirana mundu sa mulala nowakye, kuli mu kolanga.

¹² Navutswa ku goonya mwinye, avamitu, mu manye yavo avanyankanira mu miyinzi hagati henyu, nokuva avanene venyu mu Mwami, nokuva avagerehidzi venyu;

¹³ mu va bugirire ligali mu buyanzi kigira miyinzi gyavo. Mu ve nemirembe mwinye avene navene.

¹⁴ Ku tsuva mwinye, avamitu, mu gerehidze yavo avekivihiri, mu luviridze ave myoyo midedekere, mu vike avadedekere tsingulu, mwikudzire ku vandu vosi.

¹⁵ Mu henze mundu kali mulala a ta tunga wundi kali mulala ubudamano ku budamano; navutswa mu londe kazozo ki veye kilahi mwinye avene navene, kandi ku vosi.

¹⁶ Mu sangale kazozo;

¹⁷ mu saale Nyasaye bugira kuleka;

¹⁸ mu santidze ku vindu vyosi: kigira yibu bu veye ubulaliri bwa Nyasaye mu Kristo Yesu ku luvega lwenyu.

¹⁹ Mu ta siminya Roho;

²⁰ mu ta lega ubuprofeti;

²¹ mu henzeridze vindu vyosi; mu gumire ligali ki veye kilahi;

²² mwiyahule ku budamano tsing'ano tsyosi.

²³ Nyasaye mwene wemirembe a mu takase ligali; na mwinye mu sidzwe roho nomwoyo nomubiri bugira kindu kidamano, mu lidza lyo Mwami wetu Yesu Kristo.

²⁴ A veye musuuvirifu u langa mwinye, naye a la kola ndiyo.

²⁵ Avamitu, mu ku saalire.

²⁶ Mu chelidze avamitu vosi nelibusa litakatifu.

²⁷ Nzeganehidza mwinye ku Mwami, ibaruwa yiyi i somerwe avamitu vosi.

²⁸ Tsimbabasi tsyo Mwami wetu Yesu Kristo tsi ve nemwinye.