1 Timoteo 1 - KITABU KITAKATIFU

¹ Paulo, mutumwa wa Kristo Yesu kuli lilaga lya Nyasaye Muhonnyi wetu, na Kristo Yesu, lisuuviridzwa lyetu;

² ibaruwa yange yiyi i duke ku Timoteo, mwana wange weligali mu lisuuvira: Tsimbabasi neliverererwa, nemirembe gyi twulanga ku Nyasaye Dada noku Kristo Yesu Mwami wetu.

³ Kuli nda ku laga u menye Efeso, lwa nda tsia Makedonia, u duke kweganehidza avalala va tegidza megidzo lugano lundi,

⁴ kandi va ta hulira tsing'ano tsya kale tsya vutswa, nevitabu vyameta gamakula ga ta li nekiheri, aga letanga lihing'ana kuvita, lileta ubulindi bweli ndira Nyasaye obu veye mu lisuuvira; kandi kalunu nku laga ndiyo.

⁵ Na vutswa ubudukiru bwelilaga bu veye ubuyanzi bu twula mu mwoyo mulahi, nomu tsiganagani tsindahi, nomu lisuuvira li ta li nobugadi:

⁶ avalala va girunkana mu vindu yivi ni va yeka mu makuva ga vutswa

⁷ venyanga va ve avegidzi velilaga kali ni va ta manyi ga va volanga, kandi aga va vola nobuluviriri.

⁸ Navutswa ku manya lilaga li veye lilahi mundu na a va na a li kola kuli miima gyalyo,

⁹ na ku manya likuva yili, lilaga si lya lomberwa mundu mulungi navutswa lya lomberwa avebaali nava ta hulira, nava ta yeka ku Nyasaye, navobwoni, nava ta tia Nyasaye, avekifwabwi, naviitanga ise kandi aviitanga nnya, naviita mundu,

¹⁰ navaheyi, navafiraji, navivanga avarldu, navabehi, navisuhanga ububehi, kandi likuva ku gosi li ta hambana namegidzo malungi;

¹¹ kuli ivangeli yobukumi bwa Nyasaye u gasidzeywi, ya nda kolwa mulindi wayo.

¹² Inze nsantidzanga uyu wa mpa tsingulu, naye ni Kristo Yesu Mwami wetu, kigira ya mbolera kuva musuuvirifu, ni ya mbika mu butumwa bwibwe;

¹³ kali ni nda li munyegi matsyambiri, nomudambidzi, nomukoli wobudamano: navutswa nda nyola tsimbabasi, kigira nda vi kola ni nta manya mu livula kusuuvira

¹⁴ kandi tsimbabasi tsyo Mwami wetu tsya kira ligali halala nelisuuvira nobuyanzi bu veye mu Kristo Yesu.

¹⁵ Likuva yili li veye lyokusuuvirwa ligali, kandi li dukanga ku libugirirwa lyosi, Kristo Yesu yadza mu lirova kuhonnya avoni, ava mbeye kuvo munene;

¹⁶ navutswa kigira yaga nda nyola tsimbabasi, ku inze u veye munene, Yesu Kristo a duke kulang'aminya ubwikudziri bwibwe bwosi, nduke kuva kyokuhenzera ku kya yavo ava li duka kumusuuvira lwenyima va nyole livamwoyo li ta hera mba.

¹⁷ Kalunu ku Mwami u ta hera mba, kandi u toneka, kandi u ta lolekanga, u veye Nyasaye mulala yeng'ine, lidzominywa nobukumi bu ve kuve mihiga nemihiga Amini.

¹⁸ Malago yaga ndaganga ive, Timoteo mwana wange, kuli amakuva gobuprofeti ga tanga ku ive mu yaga u duke kulwana ubulwani bulahi;

¹⁹ u ve nelisuuvira nomwoyo mulahi; vya valala va malanga kuta ma vononnya lisuuvira lyavo:

²⁰ avalala ku yava va veye Humenayo na Alekisandero; ava nda ha Setani, va duke kwegidzwa va vula kunyega.