1 Samweli 9 - KITABU KITAKATIFU

¹ Inyinga vevo va li ho umundu wa Inyinga yeyo ya li ho umundu wa Benjamini, lieta lilye lya langwa Kishi, mwana wa Abieli, mwana wa Zeroru, mwana wa Bekorathu, mwana wa Afia, mwana wa Benjamini, ya li mundu wetsingulu muluviriri.

² Naye ya li nomwana muyai, wa langwa Saulo, na ya li musoleli mulahi: si ha li ho mu avana va Israeli mundu mulahi kuvita uyu: kutwula ku mavega kutsia igulu ya li mutambi kuvita avandu vosi.

³ Na tsisukiri tsya Kishi, dada wa Saulo, tsya li ni tsi goti. Na Kishi ya volera Saulo mwana wewe, Vugula mulala ku vatugwa halala nive, u tsie kwenya tsisukiri.

⁴ Naye ya vita hagati hekivala kyevigulu kya Efiraim, na ya vita hagati hekivala kya Shalisha, navutswa si va tsi lola mba: na va vita hagati hekivala kya Shaalim natsyo si tsya li yo mba: na ya vita hagati hekivala kya Vabenjamini, navutswa si va tsi lola mba.

⁵ Lwa va duka mu kivala kya Zufu, Saulo ya volera mutugwa wewe wa li halala naye, Hamba kwirane, gase dada wange a la leka kwidzulitsa tsisukiri, nokuganagana kwinye.

⁶ Naye ya mu volera, Henza, mundu wa Nyasaye a veye mu lidala yili, naye a veye mundu welidzominywa; gosi ga uyu a volanga, ligali ga kolekanga: kalunu ku tsie yo; mbula a nyala kukuvolera kindu kyolugendo lwetu lwa ku tsitsanga mu.

⁷ Kunangwa Saulo ya volera mutugwa wewe, Navutswa kwinye ni ku va ni ku tsia, ku hililira ki umundu uyu? Kigira ubukima bu gehi mu viju vyetu, kandi si ha veye nekindu kya ku nyala kuhila ku mundu wa Nyasaye: ku veye na ki kwinye?

⁸ Nomutugwa ya tivulira Saulo hali kaviri, na a vola, Henza mmukono gwange mbeye nekidieli kyevine kyeshekeli yefetha: nda haana ku mundu wa Nyasaye, a duke kukuvolera inzira yetu.

⁹ (Kale mu Israeli, mundu lwa ya tsitsanga kuteva kindu ku Nyasaye, ya volanga ndi, Ku tsie ku muloli; kigira uyo a langwa kalunu Muprofeti, kale ya langwa Muloli.)

¹⁰ Hene yaho Saulo ya volera mutugwa wewe, U voye bulahi; hamba, ku tsie. Kunangwa va tsia mu lidala lyomundu wa Nyasaye ya li mu.

¹¹ Navo lwa vanegiranga kutsia mu lidala, va vugana navakana va twula kutsia kudaha madzi, navo va va teva, Muloli a veye hano?

¹² Navo va va tivulira, ni va vola, A veye ho; henza, a veye imbiri wowo: kola bwangu, kigira wingiye mu lidala lero ndi; kigira avandu va veye nekihaanwa lero hadiguluku.

¹³ Na lwa mu duka mu lidala, mu la mu lola bwangu, imbiri lwa a kikiri kutsia hadiguluku kulia; kigira avandu si va la lia kuduka uyu yadze, kigira uyu a gasidzanga kihaanwa; na inyima avalangeywi va litsanga. Kunangwa kalunu, mwanegire; kigira mu la mu lola inyinga yiyi.

¹⁴ Na vanegira mu lidala; lwa vingira mu lidala, henza, Samweli ya twulira ku luvega lwa va li, a duke kwanegira kutsia hadiguluku.

¹⁵ Na Yahova ya li na a vuliye Samweli lidiku lilala, Saulo na a kikiri kutsia kuye, na a vola,

¹⁶ Mugamba inyinga kuli yiyi nda leta ku ive umundu u twula mkivala kya Benjamini, na u mbake maguta a ve umunene ku avandu vange Israeli; naye a la honnya avandu vange ku makono ga Vafilisiti: kigira mbenzi avandu vange, kigira lilira lyavo li duki ha mbeye.

¹⁷ Na lwa Samweli ya lola Saulo, Yahova ya mu volera, Henza mundu wa nda ku volera uyu niye a la va netsingulu ku avandu vange.

¹⁸ Hene yaho Saulo yisunda himbi ku Samweli mu kiribwa, na a vola, Mwadza, u mbolere, inyumba yo Muloli i veye haliha.

¹⁹ Na Samweli ya tivulira Saulo, na a vola, Inze niye Muloli; yimira imbiri wange kwanegire hadiguluku, kigira mu la lia halala ninze lero ndi: na mugamba nda ku leka u tsie, na nda ku volera gosi aga u veye nago mu mwoyo gugwo.

²⁰ Kandi ku makuva getsisukiri tsitsyo tsi goti madiku gavaka, u ta nyankana ku yitsi; kigira tsi mali kuloleka. Kandi gosi agenyangwa mu Israeli ga veye ku bwaha? Si ga veye ku ive noku inyumba yosi yadada wowo?

²¹ Na Saulo ya tivula, na a vola, Inze si mbeye Mubenjamini, wehiri inkekeke ligali kuvita tsihiri tsyosi tsya Israeli? Nobwiko bwange bu veye bukekeke kuvita bwiko bwosi bwehiri ya Benjamini? Kigira ki u volera inze kuli yaga?

²² Na Samweli ya vugula Saulo nomutugwa wewe, na a va vika mu inyumba yavageni, na a vikalidza hambiri hagati ha yavo ava langwa, avelivalidzwa lyavo lya li makumi gavaka.

²³ Na Samweli ya volera umudeki, Leta kidie'i kya nda ku ha, kya nda ku volera, u ki vike himbi nive.

²⁴ Nomudeki ya vugula kinama, na yosi ya li kukyo, na ya ki vika imbiri wa Saulo. Na Samueli ya vola, Henza yiki kya vikwa u ki vike imbiri wowo, u lie; kigira wa vikirwa yiki kuduka tsinyinga tsya lagwa, kigira nda vola, Nangi avandu yava. Ma Saulo ya lia vyokulia halala na Samweli lidiku zana.

²⁵ Navo lwa va mala kusulunguta kutwula hadiguluku, nokwingira mu lidala, Samweli ya volerana na Saulo ku inyumba igulu.

²⁶ Na va vuka mabwebwe: kuli inyinga ya bu kyedzanga, Samweli ya langa Saulo ku inyumba igulu, na a mu volera, Vuka, nduke kukusamulidza. Na Saulo ya vuka, na va tsia kyova, uyu na Samweli vombi.

²⁷ Na lwa va li ni va sulungutanga inyima welidala, Samweli ya volera Saulo, U volere mutugwa wowo a tsie imbiri wetu (na ya tsia imbiri), navutswa ive u tange kusingira hano, nduke kukukola u hulire likuva lya Nyasaye.