1 Kyetsinyinga 29 - KITABU KITAKATIFU

¹ Na Daudi mwami ya volera livugana lyosi makuva yaga Mwana wange, Solomoni, wa Nyasaye ya tovola yeng'ine, a kikiri mwana, mudoto, na miyinzi gyi veye minene; kigira inyumba yobwami yiyi si i veye yomundu, navutswa i veye ya Yahova Nyasaye.

² Henza, inze nombi nobunyali bwange bwosi vindu vyenyumba yiyi ya Nyasaye wange, ithahabu yevindu vyethahabu, na ifetha yevindu vyefetha, na mugasa gwevindu vyomugasa, na kivya kyevind u vyekivya na misala gyevind u vyemisala, na magina ga iberulo, na magina gokuvikwa, na magina gekibaala, na magina gamagondo lugano, na magina gobuguli budinyu ku tsing'ano tsyosi, na magina malavu ligali manyingi.

³ Kandi kuvita yaga kigira mbiki ubulaliri bwange ku inyumba ya Nyasaye wange, na kigira mbeye na akiba yange mwene, yethahabu na if etha, ngi haana ku inyumba ya Nyasaye wange, kuvita vyosi vya nda vika kwetegekira inyumba intakatifu;

⁴ navyo vi veye tsitalenta tsielfu tsivaka tsyethahahu, ithahabu ya Ofiri, netsitalenta tsielfu tsitano na tsiviri tsyefetha tsya siywa, nayo i veye yokwala ku madigi agetsinyumba;

⁵ ithahabu yevindu vyethahabu, nefetha yevindu vyefetha, na yemiyinzi gyetsing'ano tsyosi gya lombua na makono ga yavo avasidza. Kunangwa ni bwaha wehaananga mwene nomwoyo gwobulaliri lero ku Yahova?

⁶ Hene yaho avanene vetsinyumba tsyavaguga, navanene vetsihiri tsya Israeli, navanyampara vetsielfu na vetsimia, halala na yavo avameha ku miyinzi gyomwami, vehaana avene nomwoyo gwobulaliri;

⁷ navo va haana ku ubutumiki bwenyumba ya Nyasaye, ku ithahabu tsitalenta tsielfu tsitano netsishilling tsielfu tsimia tsiviri, noku ifetha tsitalenta tsielfu likumi, noku mugasa tsitalenta tsielfu likumi na tsitano na tsivaka, noku kivya tsitelanta tsielfu mia.

⁸ Na yavo ava loleka va veye na magina gobuguli budinyi va ga haana nokugavika mu akiba genyumba ya Yahova, isi womukono gwa Jehieli Mugerishon.

⁹ Hene yaho avandu va sangala, kigira va haana ku Yahova nomwoyo mudukiru gwobulaliri; na mwami Daudi ya sangala lisangala linene.

¹⁰ Kigira yaga Daudi ya gasidza Yahova imbiri welivugana lyosi; na Daudi ya vola, U gasidzwe ive, Yahova, Nyasaye wa Israeli guga wetu, mihiga nemihiga.

¹¹ O Yahova, vi veye vivyo tsingulu, nobunyali, nobukumi, neliguuta, nobwami: kigira vyosi vi veye migulu nomu lirova ni vivyo; ubwami bu veye bubwo O Yahova, ive u kuminyeywi kuva mutwe ku vindu vyosi.

¹² Ubutugi nelidzominywa vi twula ku ive, na wamehanga ku vindu vyosi; tsingulu nobunyali vi veye mu mukono gugwo; nomu mukono gugwo gu nyoleranga vosi ubunene netsingulu.

¹³ Kunangwa kalunu, O Nyasaye wetu, ku santidzanga ive, nokwidzominya lieta lilyo lyobukumi.

¹⁴ Navutswa inze mbeye bwaha, kandi avandu vange va veye ki, ku duke kwinye kunyola ubunyali bwokwehaana avene nomwoyo gwobulaliri kuli yaga? Kigira vindu vyosi vi twula ku ive, na ku haananga ku ive vi veye vivyo mwene.

¹⁵ Kigira ku veye avageni imbiri wowo, na ava menya, kuli avaguga vetu vosi va li: madiku getu mu lirova ga veye kuli kiriri, na si ha veye nelisuuviridzua lyelimenya.

¹⁶ O Yahova Nyasaye wetu, akiba yiyi yosi ya, kwa lomba ku duke kwombakira lieta lilyo litakitifu inyumba, yosi ya twula mmukono gugwo, nayo kandi ni yoyo yosi.

¹⁷ Inze manya, O Nyasaye wange, ive u geridzanag mwoyo yigwo, na u sangaliranga ubulungi. Na mze, kigira bulungi bwomwoyo gwange mali kuhaana vindu yivi vyosi nomwoyo gwobulaliri: na kalunu ndoli nobusangali avandu vovo, ava veye hano, navo va haananga ku ive nomwoyo gwobulaliri.

¹⁸ O Yahova, Nyasaye wa Abrahamu, na wa Isaka, na wa Israeli, avaguga vetu, u linde inkuva yiyi madiku gosi, i duke kuva mu tsiganagani tsyeliganagana lyemyoyo gyavandu vovo, u dinyeridze myoyo gyavo ku ive;

¹⁹ na u he Solomoni mwana wange mwoyo mudukiru, a duke kugumira lilagana lilyo, nelilolekidza lilyo, namalago gogo, nokukola vindu yivi vyosi, nokwombaka inyumba yobwami yiyi, ya nda vikira akiba yiyi.

²⁰ Na Daudi ya volera livugana lyosi, Kalunu mu santidze Yahova Nyasaye wenyu. Ma livugana lyosi lya santidza Yahova, Nyasaye wavaguga vavo, na vinaminya mitwe gyavo, ni va sigamirira Yahova, nomwami kandi.

²¹ Ma viitira Yahova vihaanwa, nokuhaana Yahova vihaanwa vyokusambwa, mugamba inyima welidiku yilyo, tsing'ombe elfu, namagondi makole elfu, navana vamagondi elfu, halala nevihaanwa vyavo vyokunwa, nevihanwa vinyingi ligali vya Israeli vosi,

²² ni va lia ni va nwa imbiri wa Yahova ku lidiku yilyo nobusangali bunene. Na vamehidza Solomoni mwana womwami Daudi hali kaviri, nokumbaka maguta a ve wa Yahova a duke kuva munene, na Zadoku a ve musalisi.

²³ Hene yaho Solomoni yikala ku intebe ya Yahova kuva mwami mbugono bwa dada wewe Daudi, na a gasidzwa; na Israeli vosi va mu hulira.

²⁴ Navanene vosi, navandu ava li vobunyali, navana vosi va Daudi, vivika ku Solomoni mwami.

²⁵ Yahova ya kuminya ligali Solomoni imbiri wetsimoni tsya Israeli vosi, nokumuha ubukumi bwobwami bwelifwana lyabwo lya vula kuva ho ku mwami wundi mu Israeli.

²⁶ Na Daudi mwana wa Jesse yameha ku Israeli vosi.

²⁷ Tsinyinga tsya yameha ku Israeli tsya li mihiga makumi gane; yameha mihiga gyitano na gyiviri mu Hebironi, na mihiga makumi gavaka negyivaka yameha mu Yerusalemi.

²⁸ Naye ya kudzira mbusakulu bwibwe bulahi, wizula madiku gege, nobutugi, nelidzominywa; na Solomoni mwana wewe yameha mbugono bwibwe.

²⁹ Na vikolwa vyomwami Daudi, vyokutanga nevyekiheri, henza, vya ng'odwa mu makuva ga Samweli muloli, nomu makuva ga Nathan muprofeti, nomu makuva ga Gadi muloli,

³⁰ halala nelyameha lilye lyosi, netsingulu tsitsye tsyosi, netsinyinga tsya vita kuye, noku Israeli, noku bwami bwosi bwevivala vindi.