1 Kyetsinyinga 10 - KITABU KITAKATIFU1 Kunangwa Vafilisiti va lwana na Israeli: navandu va Israeli viruka imbiri wa Vafilisiti, na va gwa hasi ni viitirwa mu kigulu kya Giliboa. 2 Vafilisiti va londerera Saulo navana veve budinyu; na Vafilisiti viita Jonathan, na Abina dabu, na Malikishua, avana va Saulo. 3 Nobulwani bwa duka ku Saulo ubunene ligali, na valasi vemibano va mu nyola; naye ya dambidzwa ligali kigira avalasi vemibano. 4 Ma Saulo ya volera mugingi wevyuma vivye, Somola kivavi kikyo, u ntumite nakyo; gase avasindi yavo va la ndegannya. Navutswa mugingi we vyuma vivye si ya bugirira mba; kigira ya tia ligali. Ma Saulo mwene ya vugula kivavi kikye, na a gwa kukyo. 5 Mugingi wevyuma vivye lwa ya lola Saulo u kidzi, naye kandi ya gwa ku kivavi kikye, na a kudza. 6 Ma Saulo ya kudza, navana veve vavaka; avandu venyumba yeye va kudza halala vosi. 7 Navandu va Israeli lwa va lola vosi ava li mwivona, viruki, kandi Saulo navana veve va kudzi, va leka madala gavo, ni viruka; na Vafilisiti vadza ni va menya mmadala gavo. 8 Na ga duka ku lidiku lyomugamba, Vafilisiti lwa va tsia kulanya ku vakudzu, va nyola Saulo navana veve ni va gwiye mu kigulu kya Giliboa. 9 Ni va navula vyuma vivye, na va vugula mutwe gwigwe, nevyuma vivye, ni va tuma vatumwa mu kivala kya Vafilisiti tsimbega tsyosi, kuhila makuva ku vanyasaye vavo vevifwananyi, noku avandu. 10 Na va vika vyuma vivye mu inyumba yavanyasaye vavo, nomutwe gwlgwe va gu sunga mu inyumba ya Dagon. 11 Navandu va Jabeshgileadi, lwa va hulira gosi aga Vafilisiti va kolera Saulo, 12 va singira avasatsa avaluviriri vosi, nokutwulidza mubiri gwa Saulo, nemibiri gyavana veve, ni va tsia nagyo kugyileta Jabesh, nokuta vigumba vyavo isi wo musala gwa li ha Jabesh, na va honga lilia madiku gatano na gaviri. 13 Kunangwa Saulo ya kudza kigira lihyola lilye lya ya hyola no kutinguha Yahova, mu likuva lya Yahova, lya ya vula kugumira; kandi kigira ya teva makuva ku mulala wa shukirwa, ku teva kuye, 14 na ya vula kuteva amakuva ku Yahova: kigira yaga ya mwiita, nokugirunkanya ubwami bu ve bwa Daudi mwana wa Jesse. |
©Bible Society of Kenya, 1967
Bible Society of Kenya