Salmo 141 - Manobo Western Bukidnon OT

Ked-ampù para te Pengalang te Megbevayà

¹ He Nengazen, ebpengumew-umew a kenikew, ne segugunà a tevangi. Pemineǥa nu heini is kebpengumew-umew ku kenikew.

² Isipa nu he iring te veyewà heini is ampù ku ziyà te kenikew. Isipa nu is kebeyawa ku te menge velad ku he iring kemahal te mahapun he kebpemuhat.

³ Giyahi nu, Nengazen, is kebpengaǥikaǥi ku su wey a kenà mekekagi te mezaat.

⁴ Ilikey a te kebpekevaal te mezaat wey te kedtampu te ebeelan te menge lalung. Ilikey a te kebpekivahin te ǥastu zan.

⁵ Mezawat ku is kedawey wey kedsawey kedì te metazeng he etew; kenè ku haazà mevelivezi su iyan idhimuwa zin dutun is tenged te ǥaǥew zin wey keupiya zin kedì. Iyan, is menge lalung mulà layun ku id-ampù he kenà medlampus is mezaat he menge vaal zan.

⁶ Emun ibpenimbag en diyà te pangpang is menge edumala kandan, ebpeketuu zan he tutuu is menge lalag ku.

⁷ Ne zutun egkaǥi zan te, “Ebpekedsusuwey en bes is menge tulan tew ziyà te edlevengan kenitew ne egkeiring heini te menge vatu he ebpemekeǥawas ke egkeeradu.”

⁸ Umbe, Nengazen he MEGBEVAYÀ, diyan e zà edsarig; ed-aput a ziyà te kenikew, umbe kenè nu ituǥut he egkepatey a.

⁹ Ilikey a kenikew zuen te menge penuǥes te lalung he menge etew he idhingutel zan kedì.

¹⁰ Himuwa nu he iyan sikandan meutel zuen te penuǥes dan, ne mekelikey a mulà dutun.