Zacarias 7 - Marahay na Bareta Biblia

Kinondenar nin Kagurangnan an Bakong Tudok sa Puso na Pag-aayuno

¹ Kan ikaapat na taon kan pagigin emperador ni Dario, kan ikaapat na aldaw kan ikasiyam na bulan (an bulan nin Kislev), tinawan ako nin Kagurangnan nin sarong mensahe.

² Pinaduman kan mga taga Betel si Sarezer, si Regemmelek, asin an saindang mga tawohan sa Templo nin Kagurangnan nin mga hukbo tanganing maghagad nin bendisyon sa Kagurangnan,

³ saka maghapot sa mga padi asin sa mga propeta: “Dapat daw na ipadagos mi an pagmondo huli kan pagkagaba kan Templo, sa paagi nin pag-ayuno sa ikalimang bulan siring kan samong ginigibo sa laog nin haloy nang panahon?”

⁴ Iyo ini an mensaheng nag-abot sako hale sa Kagurangnan.

⁵ Nagsabi siya, “Taraman mo an mga tawo asin an mga padi na kan nag-ayuno saka nagmondo sinda sa ikalima saka ikapitong bulan sa laog nin setentang taon, bakong ako an saindang tinawan nin onra.

⁶ Dangan kan nagkakan saka nag-inom sinda, ginibo ninda idto para sa sainda man sanang karahayan.”

⁷ Iyo ini an itinaram nin Kagurangnan sa paagi kan mga naenot na mga propeta kan panahon na mauswag pa an Jerusalem asin pano ini nin mga tawo, dangan kan panahon na an mga banwa sa palibot kan syudad kadakul an nag-eerok siring man an rehiyon sa habagat saka an mga kababan sa solnopan.

Pagsombikal, an Dahelan kan Pagtapokan

⁸ Itinao nin Kagurangnan an mensaheng ini ki Zacarias:

⁹ “Haloy nang panahon, itinao ko an mga pagboot na ini sa sakong banwaan: ‘Papangyarihon nindo an hustisya, asin magin maboot saka maheherakon kamo sa lambang saro.

¹⁰ Dai nindo pag-apihon an mga babaeng balo, an mga ilo, an mga dayuhan na nag-eerok sa kaibahan nindo, o an mga dukha. Dai kamo mag-isip nin maraot sa saindong kapwa.’

¹¹ “Alagad habo sindang maghinanyog. Sinerahan ninda an saindang mga isip

¹² asin pinatagas an saindang mga puso. Huli ta habo nindang dangogon an katukdoan na ipinadara ko sa paagi kan mga propeta na nabuhay kaidtong panahon. Kaya naanggot ako nin marahay.

¹³ Huli ta dai sinda nagdangog kan magtaram ako, dai man ako nagsimbag kan mamibi sinda.

¹⁴ Arog sa sarong bagyo, ipinalid ko sinda sa harayo tanganing mag-erok sinda sa mga dayuhan na daga. Nagin sarong mamondong lugar an marahay na dagang ini, na mayo nin nag-eerok.”