Tobit 2 - Marahay na Bareta Biblia

Selebrasyon nin Sarong Pamilya

¹ Pakapuli ko sa harong, nakaibahan ko giraray si Anna na sakong agom asin si Tobias na aki ko. Kan Pentecostes, na inaapod man Pyesta kan mga Semana, sarong bangkete an inandam para sako asin nagtukaw ako tanganing magkakan.

² Kan mahiling ko an dakul na kakanon sa atubangan ko, sinabihan ko si Tobias, “Aki ko, lumuwas ka asin maghanap nin nagkapirang kapwa ta Judio na dukhang namumuhay digdi sa Nineve, tawong tudok sa pusong nagkukuyog kan mga pagboot nin Dios. Ipag-iba mo siya digdi tanganing makahiras nyato kaining kakanon. Dai ako mapoon pagkakan sagkod na dai ka magbalik.”

Sarong Panggagadan sa Nineve

³ Kaya nagluwas si Tobias sa paghanap kan siring na tawo, alagad nagbalik siya tolos na nagkukurahaw, “Ama, may ginadan na kahimanwa ta! Tinook siya asin an saiyang bangkay itinapok sa saodan.”

⁴ Kaya hidali akong nagtindog na dai pa lamang nadotdot an sakong kakanon. Hinale ko an bangkay sa tinampo dangan dinara sa sarong malimpoy na lugar asin duman ko binayaan sagkod na magsolnop an aldaw.

⁵ Dangan nagpuli ako asin naglinig kan sakong hawak. Mamondo ako kan ako nagkakan.

⁶ Nagiromdoman ko si propeta Amos kan magtaram siya sa mga taga Betel, “An saindong mga pagpyesta magigin mga pagmondo, asin an saindong maogmang mga awit magigin mga panambitan.” Dangan naghibi ako.

⁷ Pakasolnop kan aldaw, nagluwas ako asin nagkalot nin lulubngan dangan ilinubong ko an lalaki.

⁸ An mga kanatad ko naghona na narurungaw na ako. Naghapot sinda, “Dai ka pa giraray nakanood? Ipinadakop ka na kaidto huli ta naglubong ka nin gadan, asin ginadan ka na kuta kun dai ka nakadulag. Alagad uya ka na naman naglulubong nin gadan.”

Nabuta si Tobit

⁹ Kan bangging idto, nanghanaw ako tanganing malinigan an sadiri, asin nagduman ako sa may kudal kan natad tanganing duman magkatorog. Huli ta mainit kan bangging idto, dai ko tinahoban an sakong payo.

¹⁰ Igwa nin mga dignos duman sa itaas kan kudal sa pamayohan ko, alagad dai ko aram. Naipotan ninda an sakong muklat na mga mata asin an saindang ipot nagin puting mga kiskis sa ibabaw kan sakong mga mata. Nagpabolong ako sa mga doktor alagad orog na nagluya an sakong panhiling sagkod na nabuta na nanggad ako. Nabuta ako sa laog nin apat na taon. Naherak sa kamugtakan ko an sakong mga kadugo. Inataman ako ni Ahikar sa laog nin duwang taon bago siya nagduman sa Elam.

Iriwal sa laog kan Pamilya

¹¹ Pakahale ni Ahikar, napiritan na magtrabaho an sakong agom na si Anna. Naghabol siya nin tela arog kan ginigibo kan ibang mga babae.

¹² Binabayadan siya kan mga kagsadiri para sa mga telang natapos niya. Sarong aldaw, kan darahon niya sa kagsadiri an natapos niyang tela, binayadan siya kaini asin tinawan pa nin sarong kanding.

¹³ Pagpuli ni Anna na dara an kanding, nagpoon ining maghere-here, kaya sinabihan ko si Anna, “Saen hale an kanding na iyan? Hinabonan mo iyan, ano? Ipuli mo iyan sa kagsadiri. Bakong tama na magkakan kita kan hinabonan!”

¹⁴ Alagad nagsimbag si Anna, “Irinegalo iyan sako bilang dagdag sa bayad para sa hinabol kong tela.” Alagad dai ako nagtubod saiya, kaya namula ako sa sopog huli sa ginibo niya. Pinagbotan ko siyang ipuli an kanding alagad nagsimbag siya, “Garong aram mo an gabos! Haen na an pagkamatinao mo asin an mga gibong-herak mo sa iba?”