Salmo 77 - Marahay na Bareta Biblia

Karangahan sa Panahon nin Kahorasaan

¹ Makosog na minaapod ako sa Dios; minaapod nin makosog tanganing himateon niya ako.

² Sa aldaw nin sakong kasakitan hinahanap ko an Kagurangnan; magdamlag na iniitaas ko an sakong mga kamot sa pagpamibi, alagad daing nakukuang karangahan an sakong kalag.

³ Kun iniisip ko an Dios, ako nag-aagrangay; kun ako naghohorophorop, nanluluya an sakong boot.

⁴ Bilog na banggi dai niya ako pinakatorog; nahahandal ako nin marahay, kaya dai ako nakakataram.

⁵ Iniisip-isip ko an nakaaging mga aldaw, naroromdoman ko an nakaaging mga taon.

⁶ Bilog na banggi hinohorophorop ko sa sakong puso, iniisip-isip ko asin hinahapot an sadiri:

⁷ “Isisikwal daw kita nin Kagurangnan sagkod pa man? Dai na daw niya kita mawiwilihan?

⁸ Napara na daw sagkod pa man an danay niyang pagkamoot? Natapos na daw an saiyang mga panuga?

⁹ Nalingawan na daw nin Dios na siya maugayon? Sa kaanggotan, pinupugol na daw niya an saiyang pagkaherak?”

¹⁰ Dangan nagsabi ako, “An nakakakulog kan sakong boot iyo ini— na an Dios bako nang mapangyari.”

¹¹ Gigiromdomon ko an mga gibo nin Kagurangnan; gigiromdomon ko an saimong mga ngangalasan kaidto.

¹² Iisipon ko an gabos mong gibo; hohorophoropon ko an dakulang mga bagay na ginibo mo.

¹³ Banal, O Dios, an saimong mga gibo. Mayo nin dios na siring kadakula saimo.

¹⁴ Ika an Dios na naggigibo nin mga ngangalasan; an saimong kosog ipinahiling mo sa mga banwaan.

¹⁵ Huli kan saimong kapangyarihan ilinigtas mo an saimong banwaan, an kapagarakian ni Jacob asin ni Jose.

¹⁶ Kan nahiling ka kan mga tubig, O Dios, sinda nagkatarakot, asin an mga kairaroman nagtarakig.

¹⁷ Uran inula kan mga panganoron; nagpaluwas nin mga daguldol an kalangitan; asin an kikilat naglaad sa gabos na direksyon.

¹⁸ An ribok kan saimong daguldol yaon sa buhawi; an saimong kikilat nag-ilaw sa kinaban; an daga naglinog asin tinakigan.

¹⁹ An mga alon saimong linakawan; inibong mo an hararom na dagat, alagad mayong nakahiling kan saimong inagihan.

²⁰ Siring sa sarong pastor, pinangenotan mo an saimong banwaan, sa pamamahala ni Moises saka ni Aaron.