Salmo 57 - Marahay na Bareta Biblia

Pamibi sa Paghagad nin Tabang

¹ Kaheraki ako, O Dios, kaheraki ako, huli ta minapaalaw ako saimo. Sa lindong kan saimong mga pakpak ako minapaili, sagkod na an mga bagyo nin pag-alaman makaagi.

² Minaapod ako sa Dios na Kahorohalangkawe, sa Dios na nagtatao kan gabos kong kaipuhan.

³ Masimbag siya hale sa langit, asin ililigtas ako; sosopogon niya an mga nang-aapi sako. Ipapahiling nin Dios an danay niyang pagkamoot asin an saiyang pagkamaimbod.

⁴ Napapalibotan ako nin mga kaiwal, na garo mga leon na minakakan nin mga tawo; an saindang mga ngipon siring sa mga garod saka pana, an saindang mga dila mga matarom na espada.

⁵ O Dios, ipahiling mo sa kalangitan an saimong kadakulaan, asin sa bilog na daga an saimong kamurawayan.

⁶ Mga kaiwal ko nag-andam nin litag sa sakuyang agihan, an kalag ko napapano nin kapurisawan. Nagkalot sinda sa sakuyang lalakawan, alagad sinda man sana an nahulog duman.

⁷ Bilog an paglaom kan puso ko, O Dios, bilog an paglaom! Ika sakuyang oomawon asin aawitan!

⁸ Pagmata, O kalag ko! Pagmata, sakong arpa asin lira! Pupukawon ko an kaagahon.

⁹ Magpapasalamat ako saimo, Kagurangnan, sa tahaw nin mga banwaan; sa tahaw nin mga nasyon ika sakong oomawon.

¹⁰ An danay mong pagkamoot nakakaabot sa kalangitan; an saimong pagkamaimbod abot sa kaitaasan.

¹¹ O Dios, ipahiling mo sa kalangitan an saimong kadakulaan, asin sa bilog na daga an saimong kamurawayan.