Salmo 42 - Marahay na Bareta Biblia

IKADUWANG LIBRO (Mga Salmo 42–72 ) Pamibi nin Sarong Napupungaw sa Dios

¹ Siring sa usa na hinihidaw an tubig na nagbubulos, an sakong kalag napupungaw saimo, O sakuyang Dios.

² Napapaha an kalag ko sa buhay na Dios. Nuarin ako makakarani asin makakahiling kan lalawogon nin Dios?

³ Sakong mga luha an sakuyang pagkakan sa aldaw asin sa banggi; mantang danay na minahapot sako an mga kaiwal, “Haen an saimong Dios?”

⁴ Ini gabos nagigiromdoman ko kun binubuksan ko an sakuyang puso, kan pinapangenotan ko an kadaklan, pasiring sa harong nin Dios, mantang maogmang nagkukurahaw saka nag-aawit nin pasasalamat— sarong katiriponan na nagseselebrar sa dakulang kaogmahan.

⁵ Tadaw ta mamondo ka, O kalag ko? Tadaw ta napupurisaw ka? Maglaom ka sa Dios; huli ta oomawon ko siya giraray, sakuyang tabang asin sakuyang Dios.

⁶ An sakong kalag mamondoon, kaya ika, O Dios, sakong ginigiromdom hale sa Jordan asin sa Hermon, patin sa Bukid nin Mizar.

⁷ Kairaroman nag-aapod sa kairaroman, sa ribok nin saimong mga katubigan; ako nalantopan kan saimong mga pagbulos asin kan gabos mong mga alon.

⁸ Kun aldaw ipinapahiling nin Kagurangnan an danay niyang pagkamoot; dangan kun banggi yaon sako an saiyang awit, sarong pamibi sa Dios nin sakuyang buhay.

⁹ Minasabi ako sa Dios, gapo kong panarigan, “Tadaw ta ako saimong linilingawan? Tadaw ta padagos akong nagtitios huli kan pang-aapi kan sakong kaiwal?”

¹⁰ An mga pag-olog-olog kan sakong mga kaiwal garo mga lugad na minapasakit sako, mantang padagos sindang naghahapot, “Haen an saimong Dios?”

¹¹ Tadaw ta mamondo ka, O kalag ko? Tadaw ta napupurisaw ka? Maglaom ka sa Dios; huli ta oomawon ko siya giraray, sakuyang tabang asin sakuyang Dios.