Salmo 13 - Marahay na Bareta Biblia

Sarong Pamibi sa Paghagad nin Tabang

¹ Sagkod nuarin mo ako lilingawan, Kagurangnan? Sagkod nuarin mo tatagoon sako an saimong lalawogon?

² Sagkod nuarin ko titioson an kasakitan? Sagkod nuarin mapapano nin kamondoan aldaw banggi an sakuyang puso? Sagkod nuarin an panggana sako kan sakuyang mga kaiwal?

³ Hilinga asin simbaga ako, Kagurangnan kong Dios. Balikan an sakong kosog; hare pagtugot na ako magadan.

⁴ Hare pagtugot na magsabi an sakong mga kaiwal, “Nadaog mi siya.” Hare pagtugot na mag-ogma sinda huli ta ako nadaog.

⁵ Minasarig ako sa danay mong pagkamoot; mag-oogma an puso ko sa saimong kaligtasan.

⁶ Mag-aawit ako sa Kagurangnan, huli ta nagin marahayon siya sako.