Salmo 129 - Marahay na Bareta Biblia

Pamibi tumang sa mga Kaiwal nin Israel

¹ O Israel, sabihi kami kun paano ka pinasakitan kan saimong mga kaiwal poon kan ika aki pa.

² “Makuri akong pinasakitan kan sakong mga kaiwal poon kan ako aki pa, alagad dai ninda ako nadaog.

³ Siring sa mga paraarado, linugad ninda an sakong likod; hararom an nagin mga lugad ko.

⁴ Alagad matanos an Kagurangnan; pinatalingkas niya ako hale sa kaoripnan.”

⁵ Magkasoropog logod asin magsiribog an gabos na naoongis sa Sion.

⁶ Makaarog logod sinda sa doot na nasa atop, na naaalang bago makatalubo;

⁷ dai iyan tinitipon nin siisay man o binubugkos tanganing darahon.

⁸ Mayo sa mga minaagi an nagsasabi sainda, “Bendisyonan ka logod nin Kagurangnan! Benebendisyonan mi ika sa ngaran nin Kagurangnan!”