Salmo 127 - Marahay na Bareta Biblia

Pag-omaw sa Karahayan nin Dios

¹ Kun bakong an Kagurangnan an magpatindog kan harong, masasayang sana an trabaho kan mga nagpapatindog kaiyan. Kun bakong an Kagurangnan an magbantay sa syudad, masasayang sana an pagpupuka kan bantay.

² Masasayang an pagbangon nin amay asin an pagkatorog na matanga nang marahay sa paghanap nin ikabubuhay; huli ta tinatawan nin Kagurangnan an saiyang mga namomotan, maski sinda nagkakatorog.

³ An mga aki pamanang gikan sa Kagurangnan; sinda tunay na mga biyaya.

⁴ An mga aking lalaki nin sarong tawo kan siya hoben pa, nakakaarog sa mga bosog sa kamot nin sarong paralaban.

⁵ Paladan an tawong igwa nin siring kadakul na mga bosog! Dai siya mamumugtak sa kasopogan kun makahampang niya sa hukoman an saiyang mga kaiwal.