Salmo 12 - Marahay na Bareta Biblia

Sarong Pamibi sa Paghagad nin Tabang

¹ Tabangi kami, Kagurangnan; huli ta mayo nang natatadang banal! An mga maimbod napara na sa mga aki nin tawo.

² An lambang saro nagpuputik sa saiyang kapwa; an saindang dila asin puso pano nin kaputikan.

³ Paontoka an mga dilang putikon, Kagurangnan! Serahan mo an mga ngosong mapaabaw-abaw,

⁴ na an olay, “Huli kan samong dila kami mandadaog. Sasabihon mi an samong minamawot; mayo nin makakapugol samo.”

⁵ “Madatong ako,” an sabi nin Kagurangnan, “huli ta an mga dukha nasasakitan, an mga nangangaipo nag-aagrangay. Tatawan ko sinda nin kaligtasan na saindang pinaglalaoman.”

⁶ Masasarigan an mga panuga nin Kagurangnan; siring sa purong plata, na sa horno pitong beses lininigan.

^7-8 Makukua maski saen an mga tampalasan, na nag-oomaw kan anoman na karatan. Danay kaming atamana, Kagurangnan, asin ligtasan sa siring na katawohan.