Salmo 113 - Marahay na Bareta Biblia

Pag-omaw sa Pagkamarahayon nin Kagurangnan

¹ Omawon an Kagurangnan! Kamong mga sorogoon nin Kagurangnan, omawon nindo an saiyang ngaran!

² Omawon an ngaran nin Kagurangnan ngunyan asin sagkod pa man.

³ Poon sa sirangan sagkod sa solnopan pag-omawon an ngaran nin Kagurangnan!

⁴ Halangkaw sa gabos na nasyon an Kagurangnan; halangkaw sa kalangitan an saiyang kamurawayan.

⁵ Siisay an makakaarog sa Kagurangnan na satuyang Dios, na nag-eerok sa kaitaasan,

⁶ na nagdudungaw sa langit asin sa daga?

⁷ Hale sa alpog binabangon niya an dukha; hale sa basurahan binabangon niya an mga daing sukat,

⁸ tanganing patukawon kaiba kan mga prinsipe, mga prinsipe kan saiyang banwaan.

⁹ Tinatawan niya nin harong an babaeng baog; ginigibong maogmang ina nin mga aki. Omawon an Kagurangnan!