Salmo 108 - Marahay na Bareta Biblia

Pamibi Tanganing Tabangan sa mga Kaiwal

¹ Andam an puso ko, O Dios, andam an puso ko, sa pag-awit asin pag-omaw saimo! Pagmata, O kalag ko!

² Pagmata, sakong arpa asin lira! Pupukawon ko an kaagahon.

³ Magpapasalamat ako saimo, Kagurangnan, sa tahaw kan mga banwaan; sa tahaw nin mga nasyon ika sakong oomawon.

⁴ An danay mong pagkamoot nakakaabot sa kalangitan; an saimong pagkamaimbod abot sa kaitaasan.

⁵ O Dios, ipahiling mo sa kalangitan an saimong kadakulaan; asin sa bilog na daga an saimong kamurawayan.

⁶ Huli kan saimong kosog, kami saimong ligtasan; simbaga an sakong pamibi, tanganing makaligtas an banwaan na saimong namomotan.

⁷ Nanuga an Dios hale sa saiyang santwaryo, “Sa kaogmahan, an Shekem babangaon ko, an Kapantayan nin Sukkot hihirason ko.

⁸ Sakuya an Gilead, sakuya an Manases; an Efraim iyo an sakuyang helmet, an Juda iyo an sakong setro.

⁹ An Moab gagamiton kong hanawan; itatapok ko sa Edom an sandalyas ko, bilang tanda na iyan nasasadirihan ko. Ako makurahaw ta dinaog ko an mga Filisteo.”

¹⁰ Siisay an madara sako sa pinapusog na syudad? Siisay an magiya sako sa Edom?

¹¹ Isinikwal mo na daw kami, O Dios? Dai ka na daw maiba sa samong mga hukbo?

¹² Tabang tumang sa kaiwal itao mo samo, huli ta mayong halaga an tabang nin tawo.

¹³ Kun kaiba nyato an Dios, kita manggagana; siya an maronot kan mga kaiwal ta.