Salmo 106 - Marahay na Bareta Biblia

An Pagkamarahayon nin Kagurangnan sa Saiyang Banwaan

¹ Omawon an Kagurangnan! Magpasalamat kamo sa Kagurangnan, huli ta siya marahayon; huli ta an danay niyang pagkamoot mayo nin kasagkoran!

² Siisay an makakabilang kan dakulang mga bagay na saiyang ginibo? Siisay an makakatao saiya kan maninigong kaomawan?

³ Paladan an mga nag-ootob kan saiyang kabotan, an danay na naggigibo nin katanosan.

⁴ Giromdoma ako, Kagurangnan, kun tinatabangan mo an saimong banwaan. Ibahan ako kun sinda tinatawan mo nin kaligtasan.

⁵ Mahiling ko logod an pag-uswag kan saimong mga pinili, tanganing makahiras ako sa kaogmahan kan saimong nasyon, tanganing magmuraway ako kaiba kan saimong pamana.

⁶ Nagkasala kami arog kan samong mga ginikanan; nagsombikal kami, guminibo nin karatan.

⁷ Kan an samong ginikanan yaon duman sa Egipto, dai ninda nasabotan an mga makangangalas mong gibo. Nalingawan ninda an yaman kan danay na pagkamoot mo; asin nagsombikal sa Makakamhan duman sa Dagat na Pula.

⁸ Alagad ilinigtas niya sinda huli kan saiyang ngaran, tanganing ipamidbid niya an saiyang kapangyarihan.

⁹ Pinagbotan niya an Dagat na Pula, kaya ini nagin mamara. Pinangenotan niya sinda sa paglakaw sa kairaroman, na garo naglalakaw sa desyerto.

¹⁰ Kaya ilinigtas niya sinda sa kamot kan kaiwal, ilinigtas sa kapangyarihan kan kalaban.

¹¹ Nalamos sa katubigan an mga kaiwal; mayo nin natada maski saro lamang.

¹² Saka sinda nagtubod sa tataramon niya, asin nag-awit nin pag-omaw saiya.

¹³ Alagad nalingawan tolos ninda an saiyang mga gibo; dai na hinalat an saiyang hatol.

¹⁴ Sa kalangtadan nagkaigwa sinda nin ngana-nganang kamawotan; asin sa desyerto an Dios saindang pinagsugotan.

¹⁵ Itinao niya an saindang hinagad, alagad pinadarahan man sinda nin mangirhat na helang.

¹⁶ Duman sa kampo, kan naori sinda ki Moises asin ki Aaron, an banal na sorogoon nin Kagurangnan,

¹⁷ buminuka an daga dangan hinalon si Datan; ilinubong si Abiram asin an saiyang mga kaibahan.

¹⁸ Naghilig an kalayo sa saindang mga kaibahan, asin tinutong idtong mga tawong masombikal.

¹⁹ Duman sa Sinai guminibo sinda nin estatwa nin baka, sarong dios-dios na saindang sinamba.

²⁰ Ladawan nin baka na doot an kinakakan an isinangle ninda sa kamurawayan nin Dios.

²¹ Nalingawan ninda an Dios, an saindang Paraligtas, na naggibo nin dakulang mga bagay duman sa Egipto,

²² mga ngangalasan na ginibo niya duman, mga mangirhat na bagay sa Dagat na Pula.

²³ Kan siya magtaram na tutunawon niya an saiyang banwaan, si Moises na saiyang pinili nagtindog sa saiyang atubang, nakimaherak na dai sinda tunawon kan saiyang kaanggotan.

²⁴ Dangan hinaboan ninda an mayaman na daga; dai sinda nagtubod sa saiyang panuga.

²⁵ Nagngorob-ngurob sa laog kan saindang mga tolda, asin dai dinangog an tingog nin Kagurangnan.

²⁶ Kaya nagnumpa siya asin sinda pinatanidan na magkakagaradan sinda sa kalangtadan,

²⁷ na magkakawararak sa mga nasyon an saindang kapagarakian, asin magkakagaradan sa mga daga kan dayuhan.

²⁸ Dangan nagsamba sinda ki Baal duman sa Peor; nagkakan kan mga atang para sa gadan.

²⁹ Huli kan saindang mga gibo, pinaanggot ninda an Kagurangnan; kaya uminabot sainda an mangirhat na helang.

³⁰ Nagtindog si Finehas saka nakimaherak, kaya naontok an mangirhat na helang.

³¹ Nabantog siya huli kan saiyang katanosan, poon kaidto asin sagkod pa man.

³² An Kagurangnan pinaanggot ninda sa katubigan nin Meriba; asin naparaot si Moises huli sa sainda.

³³ Pinangagin nindang mapait an puso ni Moises, kaya dai na inisip kaini an tataramon na minaluwas sa ngoso.

³⁴ Dai ninda rinonot an mga banwaan, siring sa ipinagboot sainda nin Kagurangnan;

³⁵ kundi nakipag-agoman sinda sa mga pagano, asin inarog an saindang mga gibo.

³⁶ Mga dios-dios kan mga pagano sinamba ninda, na nagin siod para sainda.

³⁷ Mga aking lalaki saka babae saindang inatang sa mga dios-dios nin Canaan.

³⁸ Ginadan ninda idtong mga inosenteng kaakian, kaya an daga nadigtaan nin dugo kan siring na panggagadan.

³⁹ Nagin maati sinda huli kan saindang mga gibo, asin nagtalikod sinda sa Dios.

⁴⁰ Kaya naglaad an kaanggotan nin Dios sa saiyang banwaan; asin nabaldi sa saiyang pamana.

⁴¹ Sa kamot kan mga pagano itinao niya sinda, kaya nasakop kan mga anggot sainda.

⁴² Inapi sinda kan mga kaiwal; nagin sakop kan saindang kapangyarihan.

⁴³ Dakul na beses ilinigtas sinda nin Kagurangnan, alagad pinili ninda an magsombikal, asin orog sindang nalunod sa kasalan.

⁴⁴ Alagad hiniling nin Kagurangnan an saindang kasakitan, asin dinangog an saindang inagrangay.

⁴⁵ Huli sainda giniromdom niya an saiyang tipan; asin sa kadakulaan kan danay niyang pagkamoot, naglumoy an saiyang boot.

⁴⁶ Pinangagin niyang maherakan sinda kan mga nagsakop sa sainda.

⁴⁷ Ligtasan kami, Kagurangnan nyamong Dios, asin tipona kami hale sa mga nasyon, tanganing pasalamatan mi an saimong banal na ngaran saka magmuraway sa saimong kaomawan.

⁴⁸ Pag-omawon an Kagurangnan, an Dios nin Israel, ngunyan asin sagkod pa man! Gabos na banwaan magsabing, “Amen!” Omawon an Kagurangnan!