Salmo 103 - Marahay na Bareta Biblia

An Pagkamoot nin Dios

¹ Kalag ko, mag-omaw ka sa Kagurangnan! Bilog kong pagkatawo, omawon an saiyang banal na ngaran!

² Kalag ko, mag-omaw ka sa Kagurangnan; an gabos niyang balaog dai mo paglingawan.

³ Pinapatawad niya an gabos kong kasalan, binobolong niya an gabos kong helang.

⁴ Buhay ko iliniligtas sa lulubngan; benebendisyonan niya ako nin danay na pagkamoot asin pagkaherak.

⁵ An buhay ko pinapano niya nin mga biyaya, kaya danay akong hoben asin makosog arog kan agila.

⁶ An Kagurangnan minapahiling nin pagbalos asin hustisya para sa gabos na inaapi.

⁷ An saiyang mga plano ipinahayag niya ki Moises; an saiyang mga gibo sa banwaan nin Israel.

⁸ Maheherakon an Kagurangnan asin maugayon, maluway sa pag-anggot, mayaman sa pagkamoot.

⁹ An saiyang kaanggotan igwa nin kataposan; dai siya naaanggot sagkod pa man.

¹⁰ Dai niya kita pinapadusahan sosog sa satong mga kasalan, dai niya kita binabalosan sosog sa satong mga karatan.

¹¹ Siring na an langit halangkaw sa daga, an danay niyang pagkamoot dakula para sa mga may pagkatakot saiya.

¹² Kun gurano an rayo kan sirangan sa solnopan, siring man an pagrayoan niya sa sato kan satong mga kasalan.

¹³ Siring na an ama naheherak sa saiyang mga aki, an Kagurangnan naheherak man sa mga may pagkatakot saiya.

¹⁴ Aram niya kun hale sa ano kita ginibo; romdom niya na kita mga kabokabo.

¹⁵ An buhay nin tawo kabaing sa doot; minatalubo siya arog kan burak na yaon sa oma;

¹⁶ dangan inaagihan nin doros asin nawawara, dai na giraray nahihiling.

¹⁷ Alagad an danay na pagkamoot nin Kagurangnan sagkod lamang para sa mga tawong may pagkatakot saiya; an saiyang katanosan magdadanay sa gabos na henerasyon;

¹⁸ sa mga minaotob kan saiyang tipan asin maimbod na naggigiromdom kan saiyang mga togon.

¹⁹ An saiyang trono ibinugtak nin Kagurangnan sa kalangitan; an gabos sakop kan saiyang kahadean.

²⁰ Mag-omaw kamo sa Kagurangnan, kamong makosog asin mapangyaring mga anghel, na nag-ootob kan saiyang mga kabotan, na naghihinanyog kan saiyang mga itinaram.

²¹ Mag-omaw kamo sa Kagurangnan, kamo gabos na saiyang hukbo, kamong mga sorogoon niya na nag-ootob kan saiyang kabotan!

²² Gabos na linalang, mag-omaw kamo sa Kagurangnan, sa gabos na lugar na saiyang pinaghahadean. Kalag ko, mag-omaw ka sa Kagurangnan!