Salmo 10 - Marahay na Bareta Biblia

Sarong Pamibi para sa Hustisya

¹ Tadaw ta harayo kang marahay, Kagurangnan? Tadaw ta nagtatago ka kun kami nasa kahorasaan?

² Sa kapaabaw-abawan linalamag kan mga maraot an mga dukha; dakopa sinda sa mga siod na ginibo ninda.

³ Huli ta ipinaghahambog kan maraot an mga kamawotan nin saiyang puso; minamaldisyon asin tinatalikdan an Kagurangnan kan tawong paslo.

⁴ An tawong tampalasan dai naghahanap sa Kagurangnan; an gabos niyang nasa isip, “Mayo nin Dios.”

⁵ An tampalasan mauswag sa gabos na panahon. Dai niya nasasabotan an mga paghukom nin Dios; tinutuya-tuya niya an saiyang mga kaiwal.

⁶ Nasa boot niya, “Mayong makakahiro sako; dai ako mamumugtak sa kapahamakan.”

⁷ An saiyang ngoso pano nin maldisyon, kaputikan asin pang-aapi; sa dila niya yaon an karibokan asin karatan.

⁸ Sa mga baryo nagtutukaw siya sa paghipa, naghahalat tanganing manggadan kan mga mayong sala. Binabantayan niya an saiyang magigin biktima,

⁹ siring sa sarong leon sa saiyang pinagtatagoan. Minahipa siya tanganing madakop an mga dukha; sinisiod niya sinda dangan ginuguyod sa harayo.

¹⁰ Nagkakaroronot an mga biktima; nadadaog huli sa kosog niya.

¹¹ Nagsaboot siya, “Mayong pagmakulog an Dios! Tinakpan niya an saiyang lalawogon asin dai niya nanggad ako mahihiling!”

¹² Tumindog ka, Kagurangnan; O Dios, itaas mo an saimong kamot! Hare paglingawe an mga nagtitios!

¹³ Tadaw ta an Dios isinisikwal kan tampalasan asin minasaboot, “Dai niya ako papadusahan”?

¹⁴ Alagad nahihiling mo; namamasdan mo an kahorasaan asin kasakitan; danay kang andam sa pagtao nin tabang. An dukha minasarig sa saimo; ika an danay na nagtatabang sa mga ilo.

¹⁵ Baria an takyag kan maraot saka parakasala; padusahan mo sagkod na dai na sinda maggibo kaiyan.

¹⁶ An Kagurangnan hade sagkod pa man. Mawawara sa saiyang daga an mga nagsasamba sa ibang dios.

¹⁷ Dadangogon mo, Kagurangnan, an mga pamibi nin mga mahuyo; tatawan mo sinda nin kosog nin boot.

¹⁸ Dadangogon mo an mga inagrangay kan mga naaapi asin mga ilo; susurogon mo sinda sa saimong paghukom, tanganing dai na manakot an mga tawong daganon.