Parahulit 11 - Marahay na Bareta Biblia

An Ginigibo nin Madonong na Tawo

¹ Magnegosyo ka sa ibang nasyon, asin maabot an aldaw na makakaganansya ka.

² Magnegosyo ka nin manlaen-laen saka sa dakul na lugar, huli ta dai mo aram kun anong maraot na palad an maabot saimo sa kinaban na ini.

³ Kun an langit madampog, totoong mauran; kun matumba an sarong kahoy maski saen na direksyon, duman iyan mahigda sa hinugpaan.

⁴ Kun mahalat ka pa kan doros asin kan tamang panahon, mayo kang ikakatanom saka mayo kang aanihon.

⁵ Dai mo masasabotan an ginigibo nin Dios na naglalang kan gabos, siring na dai mo masasabotan an pagpoon nin buhay kan sarong aki sa tulak nin sarong babae.

⁶ Magtanom ka sa aldaw asin man sa banggi, huli ta dai mo nanggad maaaraman kun an gabos na itinanom mo matalubo nin marahay o kun an saro mamumunga nin dakul ki sa saro.

⁷ Magayon an liwanag asin nakakawili an paghiling kan aldaw.

⁸ Magpasalamat ka para sa lambang taon nin saimong pagkabuhay. Maski gurano kahalawig an saimong buhay, mas halawig an panahon nin saimong pagkagadan. An gabos pang maabot mayo nin halaga.

Hulit sa mga Hoben

⁹ Mga hoben, ipag-ogma nindo an saindong pagkanihoben; mag-ogma kamo mantang kamo aki pa. Giboha an boot nindo asin sunoda an kamawotan kan saindong puso. Alagad giromdomon nindo na huhukoman kamo nin Dios sa gabos nindong gibo.

¹⁰ Lingawan nindo an anoman na kahandalan nin isip o kulog nin hawak, huli ta dai man mahahaloy an saindong pagkanihoben.